CC24Març#07 – Blu cobalt

#07 – Blu cobalt

E siere i voi, planc, dolcementri, ma e somee serene. Nora nus sta par lassâ. Lu sai jo, che i cjapi i batits cul gno orloi di paramedic: il so cûr al piert colps, come se ju lassas fuî. No je mê none, ma in dute la valade le clamin cussì: la ultime persone intal paîs bandonât di Davois, an dal Signôr 2106.
“Se o fossis vignude jù in citât cemût che us vevin det, none, inveze di fâ le salvadie ca sù di bessole cumò…”
“Ssh” mi sunsure jê, cence vierzi i voi, cun dolcece, cuasit che e fos jê a consolâmi par la mê, di muart. E respire a fonts e mi sunsure inmò: “Blu cobalt”.

“Ce veiso det, none?”
“Il timp al è strafont di spazi, al è une dimension. Dome che nô stupits umans no le viodìn. Le viodìn i arbui, che a si movin plui lents, forsi qualchi anemâl, e i fruts piçui che inmò no san tabajâ. In tal stes pont ‘nd è stât un arbul, un ors, une mari, une mont. E se la nestre vite e fos une foto di chestis cinc dimensions, i nestris spostaments, i nestris amôrs i samearessin, a un che a nus cjalas di fôr, come un cuadri dulà che la vite di ognun di nô e je un dipint unic. E jo ai simpri pensât a le mê vite come un blu cobalt. Mi veis det: “anìn in citât, il paîs al è vueit” e tos “ma il paîs a nol è vueit, al sclope di vite: in chest cuadri son imò lis ridadis dai fruts, il profum da lis fameis a la ore di gustâ, le musiche, i bancs di scuele, il ridi e il vaî, e flôrs che i son inmò butui, e encje sflurîts e inflapîts insiemi. I son ca, ducj ca, ducj contemporaneamentri ca. Ce furtune che o vin! Forsit qualche specie animâl lu sa, forse i fruts cuant che i no san tabajâ, forse i vecjus cuant che i stan par murî. Eco: jo i viôt, e i sai. E il gno cuadri si complete cussì.”
E siere planc i voi, come se cun chestis peraulis e ves finît il flât tai polmons. Il so cûr si ferme. E somee serene, cuasit contente.

La ambulance si lasse devoûr la livree di un paîs di mont bandonât, tarombulant par l’asfalt disfat, cul cuarp di Nora inte sô panze cjalde. I vuidi planc, e i pensi che, devûr di nô, i stin lassant une lungje, lungjissime sdrasse blu cobalt che, metro dopo metro, a si smavìs.

di Fulvio Romanin (Nevio)
#1572

3 comments