CC24Fevrâr#13 – La sglavinade tal bosc

#13 – La sglavinade tal bosc

Ce coions! La lezion del professôr plui soporifar de scuele e steve par scomencâ.
E veve voie di scjampâ.
E veve voie di lassâ chel puest claustrofobic, lâ vie.
Il professôr forsit vuê al varès finît di spiegâ chel fetôs di Gabriele D’Annunzio.
Ma parcé vevie di sinti fevelâ di un om cussì plen di sé?
Un scritôr che si pierdeve in descrizions detaiadis cun peraulis mai sintudis e che al dave impuartance a fats e ats che no disveavin nuie in jê.
Fûr il soreli al sflandorave ancje se e jere dome la fin di Març.
Si imagjinave di jessi a cjase a viodi la ultime pontade de sô serie preferide.
E veve il cjâf ator. Di bot il professôr al fâs une polse. Daspò cun vôs taronde al tache a recitâ:

“Tâs Su la jentrade
dal bosc jo no sint
peraulis che tu disis
umanis; ma o sint
peraulis plui gnovis
che a fevelin di gotis e fueis
lontanis.
Scolte. Al plûf
dai nûi sparniçâts.
Al plûf su lis tamarîs
saladis e sutis,
al plûf sui pins
scaiôs e spinôs,
al plûf sui mirts divins…”

Al jere alc che al someave a une danze. In tal so cjaf e sintive: un doi trê, un doi trê, un doi trê…
Planc a planc lis peraulis le concuistavin. E sintive lis gotis de ploie che a colavin un tic ae volte parsore de sô muse. E fûr no jere plui il soreli, ma e viodeve il arbui fâsi dongje, lis ramacis simpri plui dongje dai barcons.

“E al plûf su lis nestris musis
salvanis,
al plûf su lis nestris mans
crotis,
sui nestris vistîts
lizêrs,
sui frescs pinsîrs
che la anime e vierç
novele,
su la flabe biele
che îr
mi ilût, che vuê ti ilût,
o Ermione.”

Ce maravee… trop le vevie strissinade vie cheste sglavinade di peraulis…

di Alessia Meacci, Patrizia Torossi (Incocalît)
#1550

3 comments