CC24Fevrâr#04 – Fam

#04 – Fam

Rivaraial il so piçulut a durmî usgnot? Il sunsûr ronc che i ven sù al bale cul vueit dal stomi malcuiet de femine che si muart lis aìnis cun rabie.
Un vint rivât dal scûr de gnot al puarte il savalon dentri de cjase e i fâs sierâ cun fuarce i voi. Il picinin si svee cuant che la sô piel si incee cul picjâ dal vint spietât.
Al zire il cjâf ancjemò indurmidît par cjatâ la sô muse. Al podarès tacâ a vaî se i siei voi no fossin di tant timp suts. E la mari no à plui lat, no i pues puartâ confuart, parcè che dal so pet sec no i ven fûr plui nuie.
Lu cjape strent par fâi sinti il clip dal cuarp e par niçulâlu fin che i prins rais dal soreli a lenzin lis grispis de tiere secje.
Cumò il frutin al duar e la mari i va daûr tal paîs dai siums, dulà che i ricuarts si jemplin di jerbe gruesse ator ator de cjasute. Plui inlà lis cjavris a mangjin tal prât intant che la cjice lis vuardie vuacant cun grinte. Dal ort i rive la vôs dal so om che al bagne lis fueis verdis gnovis. Il so cjantâ melodiôs al mude intun rontonâ simpri plui fuart.
Al è il motôr di une machine che le svee cence clemence. I va incuintri, incurioside.
Une zovine ben metude e salte fûr cuntun om che al puarte une cjamare di television. A vegnin de citât lontane che i contave il so om, dulà che no je mai lade. Ma il non dal imprest al somee traviersâ la fumate dentri dal so cerviel. Gjornaliscj achì, a fâ ce?
Chei doi si cjalin ator e a fevelin a vôs basse, a dan une cucade dentri de cjase pe puarte vierte. Ise fate di aiar che no le viodin e no i fevelin?
Ma la zovine e somee convinte e cuntun segnâl al om e tache a fevelâ te cjamare.
Cumò si zire par domandâ alc come se a fossin intune conversazion tacade une mieze ore prime:
“E alore ce i covential pal so frutin?” I dîs cun sigurece. Jê no capìs. A son rivâts de citât cu lis mans vueidis a buinore.
“Al à fam…” i rispuint avilide.
“Fam?” e domande cun sodisfazion, al jere chest che a jerin vignûts a bevi: il so dolôr.
“Gno fi al vai parcè che al à fam di aghe”.

di Noemi Salva (Mari de Gnot Nostrane)
#1541