CC24Zenâr#07 – Chel birbant di Carlin

#07 – Chel birbant di Carlin

Ancje in chê gnot, Carlin, avilît, zirantsi tal jet, al bramave, dibant, che lis mans di Morfeu i studassin i voi. Ce biel finî tai braçs di chel Diu, tal scûr de sô gnot, indulà che si pierdin ducj i pinsîrs e i dolôrs; indulà che, ogni tant, ti somee di jessi bon di svolâ.
Puar Carlin, al jere di un pieç che al lave a pognisi cence rivâ a sierâ un voli. È dut al jere tacât di in chê gnot che al jere lât ae fieste in cjase di sô agne Rosine. Puarete, al jere cuissà di cetant che nol lave a cjatâle. Une femine buine, ancje se tal paîs a disevin che e jere une strie.
Une nomee che di sigûr je vevin dade pai cjapiei capriçôs e par chei vistîts stravagants che si meteve intor. Vere, inte sô cjase e veve ancje disesiet gjats neris e cuatri civuitis. Cun di plui, tal prât, che si slungjave daûr dal so stabil, ogni tierç vinars dal mês e imbastive une fieste, cun bai, cjants tal mieç di fums colorâts, cun preieris di gracie in latin, in esperanto e furlan, indreçadis ai agnui custodis dal cîl e da tiere, i stes spirts che a lozin dentri di nô.
Di chei spirts che Carlin, e no dome in chê sere, ma di une vore di timp, si jere smenteât.
E no savint che in chê fieste a jerin tancj mâcs e tantis striis, chê int che a vîf dome di spirt, balant cu la fantate plui biele, le veve bussade cence padin, no metint un fregul di cûr.
Chê frute e jere une strie e, sintint che Carlin sui siei lavris, tai siei voi, al meteve dome la passion di un mascjo in calôr, subit e à pensât di striâlu.
Puar frut! E cumò par disfâ chel malvoli, che no lu lassave durmî, ce vevial di fâ?
Su consei di  sô agne Rosine al veve di cirî chê fantate e di gnûf, par trê gnots, sot la lune plene, al veve di tornâ a bussâle.
E cussì a son ladis lis robis, dopo vele cjatade, spielantsi tal turchin dai siei voi, scoltant il zornâ dal rusignûl, cheste  volte di cûr, le busse ancje se strie.
L’amôr al è magjic e universâl, al vuaris ogni mâl e al cuiete ogni dolôr. E chê frute in chês gnots jal veve donât. Carlin, finalmentri, al è vuarît e strenzintsi al so pet si è indurmidît.

di Nello Malisano (Gjino)
#1514

5 comments