La epidemie di Nadâl a Pordenon

Lis storiis plui bielis a scomencin dutis cun doi amîs tal bar, si dîs. Chês plui brutis, alore, a scugnìn tacâ cuntune cjoche di sledrosâsi.
– Âstu voie di lâ a sdrondenon, usgnot?
– No, ai dome voie di fraidî a cjase. Îr soi lade alì des barachis di Nadâl a Pordenon e cuntun par di brulè jeri za sbalinade, tant che nancje rivavi a cjatâ la machine. Vuê di buinore ai butât fûr robe di colôr viole, acide e stomeose.
– Ostie ce porcarie! A jerino invelegnâts cu le cragne magjiche dal marcjadut di Nadâl a teme Harry Potter? Dut câs, vierç i barcons par fâ passâ un pôc di aiar, par platâ l’odôr di putrefazion.
– Ma ce disistu! Il teme Harry Potter, magari cussì no, al è stât lassât in bande, par vie de violazion dai dirits di autôr. Pecjât, vevi voie di lâ a viodi la partide di Quidditch.
– Bah, cumò però soi curiôs di bevi un di chescj brulè maledets.

No lu vessie mai fat: al deventarà il vetôr de epidemie zombi e, ca di cinc mês, di Pordenon al restarà dome un côl di rudinaçs, dulà che a balinin dome i vendidôrs di vin cuinçât, cuntune ghigne plene di dincj uçâts e sodisfazion pe lôr baronade. Ce che al reste dai pordenonês doc a son dai zombi, che a talpinin sù e jù pes stradis cui cjapiei nadalins tal cjâf e cu lis bavis violaciis di brulè mefitic che al va jù pal cuel vuast, rugnant peraulis in venit e corint daûr dai pôcs pandolos ancjemò in vite. Ma des semencis di resistence a son ladis indilunc: i Potterheads, vignûts in citât pe partide di Quidditch, si son cjatâts in cunvigne cui punk dal puest, par vie che ducj doi a jerin cuintri dal copyright. E cussì, cualchi volte a fasin incursions in citât, armâts di manis di scove e di discs cu le scrite “No SIAE”, ch’a tirin cuintri i zombi e i bruletadôrs diabolics.

– Nus an puartât vie lis cjasutis di Harry Potter e il centri sociâl – a disevin – a sarà dure, ma par lôr!

Il timp no rivarà a sdrumâ chest ultin bastion di civiltât pordenonese cuintri dai zombi, ancje se limitât a Tor. Lis dôs comunitâts a rivaran a meti adun une societât teocratiche autogjestide, cence copyright e su le fonde di une gnove religjon, vignude fûr dopo di un pâr di agns di isolament, cussì che il timp, daûr des baricadis e lontan dai turiscj forescj, al è segnât dai rituâi pe venerazion dal Martar Albus Silente e dal Messie Joe Strummer, tal dì dal sacri Nadâl, inovâl dulà che al ven rinovât il pat jenfri i doi grups costituents e a vegnin scambiâts i regâi, pal plui libris fruiâts di J.K. Rowling e discs inservibii.

di Alessio Ecoretti
#1***

1 comment