27 di Otubar dal 2023

Il câs di Lupo Manarie e da lis gotis di sanc

E jere domenie ai 29 di Otubar, e jere pene passade une biele gnot di lune plene e Lupo Manarie al decît di lâ nuiemancul che a Gjalarian, li dal Spaccio Raffl, aes sîs sot sere, a viodi il Cocecurte Day!
Pecjât che dopo si met a zuiâ di gjavâsi la cjamese cul comissari Rocheton e al rive tart, ma pôc mâl, a lui i interesse dome il ghiringhel!
Da rest, lu à dite ancje a ducj i siei amîs, che al è ce gjoldi, li di chei soversîfs di Contecurte, e lôr a devin vêlu cjapât in peraule (i siei amîs, o intindìn). O almancul, chê e je la sô pôre, cuant che rivât li de jentrade al viôt sul marcjepît… gotis di sanc! Ma tantis eh!
E alore al jentre come un sfolmenât, par scuvierzi di cui che al è chel sanc!
Il prin che al cjate al è Impiro il Vampiro, che al à la bocje plene tant che un gnotul che al à pene glotût Kafka il grison.
«Di cui isal chest sanc?» i domande.
Ma Impiro al mostre il toc di pan cu la coce che al à in man e al alce lis spalis. «Non fo niente, ma non fi può cavav sangue da una… ‘succa», i rispuint chel. E nuie, al è dal sigûr inocent, chel altolocât di vampîr.
E alore vie, Lupo Manarie al va li de mumie Igjeniche. «Cjarte!» i dîs, «Sêstu stade tu a copâ cualchidun?» Ma la mumie, che no si è mai capît se e je parint dal cjantant, e je masse impegnade a maglâsi lis bendis cu la polente cul gorgonzole misturade ai tocs di formadi e alore si limite a alçâ la palete a forme di coce doprade pes votazions. No, al pense Lupo Manarie. Un sdavàs come jê al sarès dut sporc di sanc. E je inocente.
Alore al va li di Mortuorium, un zombi une vore timit che nol olse nancje saltâ fûr de casse che lu àn soterât. Chel al è li che al lei une contecurtute, e intant al pare jù struc di miluç cjalt nancje che al fos brulè.
«Esisàqèoieorn òadàlèazlkcmnpa sdazuodapèp», al trabascje sbavosant.
In pratiche al è cjoc. E nie, nancje lui nol pues jessi il colpevul.
Lupo Manarie alore al va li di un pâr di mudantis che a svoletin par aiar.
«Sint po tu, Fantasma Cjalcjut!»
«Cjalçut… prego. Mi clami Fantasma Cjalçut».
«Ma se tu âs intor i boxer? No varessistu di vê intor un cjalçut?»
«E ma mi vergognavi…»
«Ma se tu sês invisibil!? Bon… ma nol è chest il fat. Dîmi di chês gotis di sanc là di fûr».
«Ehm… Lupo. Sêstu çondar? Jo soi un spirt. Crodistu che no mi plasarès cerçâ chei cubotti alla mela e zucca? E invezi nuie! O pues dome cjalâiu. Figuriti se soi bon di fâ sanganâ cualchidun!»
E in efiets, forsi ancje il Fantasma Cjaçut al è inocent.
Cui vanzial?
Ah! Velu là! Il mostri de palût che al mangje miluçs a manete! Lupo Manarie al va di buride li di Fuoco Fausto, lu poche su la piel di pes frait plene di bugnons e i domande se lui al à par câs mangjât cualchidun e sporcjât il marcjepît di sanc.
«Jo?» i rispuint chel, «Ma jo soi stât chi dute la sere a mangjâ i crostins cu la marmelade di coce, lis fertais, lis omelette, il cocis spinosis… Insome. Tu sâs ben che la mê prioritât e je… il mangjâ!»
E in efiets, al veve reson ancje chel. Se al è di mangjâ lui nol pense a altri. E chi al jere ogni ben di diu.
Sì che duncje, cui vanzial?
Ah! Lui! Velu là che al comuniche inte sô maniere, ven a stâi cul alfabet morse fat di… messaggi del corpo, disìn cussì. «Mandi, Strion Pedeon!» lu salude Lupo.
«Pr Prrrr Prrrr Pr Pr».
«Sì, va ben, ma sêstu stât tu?»
«Pr!».
Ma in efiets, ancje il Strion Pedeon i pareve inocent. Cuistion di fiuto. E Lupo Manarie ‘nd àn une vore e al scugne scjampâ. E pôc i mancje che no si inçopedi intes cocis spinosis che a rodolavin dapardut!
Però al veve ancje finît la sô indagjine… Ma in chel al viôt su la grande taule il premi che al vinceve la conte plui biele de serade e i ven un dubi teribil.
«Scusait! A di part il sanc… ma cui aial vinçût il Cocecurte Day?»
I siei amîs si cjalin un cul altri, cuntun pît a sburtin sot de taule il cuarp dal vincidôr, aromai ridot a un grop di cjâr mastiade e budiei ingropâts.
A alcin lis spalis.
«No savìn», a rispuindin ducj insiemi, riduçant.