Il gjeneradôr

La lampadine e cise e ti cimie di scûr.
Il gjeneradôr al è li par tirâ i sghirets. E no tu rivis adore a pensâlu che ti sunin il campanel. Tu crustis une blesteme, ma… tu sês l’unic in dut il condomini che al è bon di cambiâ il gjeneradôr.
E di prionte a durin simpri mancul!
Po ben… Tu glotis il tai e tu metis vie il formadi frant. A son part dai tiei onôrs. Samantha, crote sul jet, si russe e ti cjale dulinciose, intant che tu metis sù tute e manecis. E je la plui frice, di chês vanzadis intal condomini. Un altri dai tiei onôrs.
Tu jessis intal coridôr, tu cjolis une des gabiutis.
Po dopo tu vâs sù fin al ultin plan e tu cjalis sot.
I muarts a sono dapardut.
A jemplin trois e stradis; a van a sbati un cul altri tant che in gjiostre, intun cricâ di vues e pacjâ di cjar patoche.
Tu ti ponis bande soreli jevât, tu vierzis la puartele. Al gjat i covente cualchi secont par colâ vincj plans.
Lis stradis ator dal condomini si svuedin. Dulà che tu âs butât la lescje al è dut un buligâ di viers. Il ‘siminâ al rive fin adalt.
Tu coris abàs, tes cantinis, tu cjapis sù il maçûl, tu jessis pal tombin bande soreli a mont, tu cuchis dal cjanton e tu spietis.
Tu sês fortunât.
Ind è un gnûf. Intîr. Al rugne e al cor plui di chei altris. Tu âs di cori ancje tu par distacâlu e zirâti a spacâi la coce cuntun colp sec. Tant, chê robe che tu ju tornis a copâ e je une cagade: si ju cuiete chel tant di peâiu.
E chest tu rivis a pêl a strissinâlu dentri e sigjilâ il tombin.
Cumò la part facile.
I zenoi dal gjeneradôr di prin a sclipignin cudui a ogni pedalade. Lis tetis a son sportis fraidis a pendolon su lis cuessis. La gramule e je colade, regalantji une aerodinamiche scalembre. Tu dopris il maçûl par pocâ vie i ratatuis. Il condomini al reste cence lûs par pôc: aromai tu sês babio ancje a tornâ a meti lis cjadenis intor di manuvri e pedai.
Il gnûf gjeneradôr al va come un tren, ma al rone masse.
Tu i gjavis vie une tibie a chel di prin e tu je ficjis jù pe gose.
Sodisfat, tu tornis sù a finî il formadi.

di Rafaêl Serafin
#1***

1 comment