CorseCurteDicemabar#13 – Gjal di nêf

#13 – Gjal di nêf

O lei ROSSIGNOL, ma il logotip nol è un rusignûl, al è un gjal, un gjal ros e neri.
Isal Verdana Pro Black o Semi Bold? Al è pulît, sclet, moderni, mi plas une vore… Ce robe ise? Caratars in neri plen, font blanc pûr, al ê scrit suntun… schi? Dulà soio? Al è cuiet chi. Cidin, scûr, comut, tant che dentri un cussin fof metût intun landri mulisint.
O ai la lenghe sute. Le buti fûr e o sint il frêt. Ce robis fasevio prin di chest?
O cjali disot e o cjati REUSCH… Arial Black cence dubi… caratars neris font blanc ancjetant… une manece di… schi?…
Mi plâs une vore Arial Black ma o ai miôr Cormorant Garamond, elegant tant che nissun altri, e il gno nûf font favorît…
O cîr di movi il cjâf e o sint che o soi impresonât, o somei fât di glace, i miei pîts e mans no rispuindin, mi sint dentri di un orsut zigant, juste cumò no ai voie di movimi, ma ce al sucedaressie se o volès fâlu? Mi scjafoie il panic, O SOI CJAPÂT sotsore cuatri toneladis di plumis blancjis che mi sfrachein cuintri di un plan cussì blanc come il tet… ma, no son plumis: e je la nêf: o soi stât cjapât di une lavine!? … o savevi che al jere pussibil, però, come par solit, o ai ignorât i segns de piste, e cumò o soi chi, rogant stupidel: o lu ai fât une altre volte!
Cormorant Garamond al è il sielzût!… o ai di doprâlu par il gno curriculum vitae… o dovevi vêlu finît un mês indaûr chel maledet… la lenghe e je sute ancjemò, o supi la nêf e la idee di jessi cjapât mi sclafagne in muse, la claustrofobie e incrès a ogni secont, la voie di cambiâ di puest ancjemò di plui, un berli disperât al tente di vignî fûr di bocje, dome che o pues butâ fûr dome un sun flevar, tant che un muribont: no puedio nancje domandâ jutori?…  movintmi tant che un vier impicotît intun stechedincj mi met di cuestis, saraial dut ce che tu tu puedis fâ?… o pensi a dut ce che o ai let su lis lavinis che, a voltis, la int e reste intune bufule di aiar che i permet di resisti fin che a vegnin i socoridôrs, che i Sants Bernarts a son bogns tant che cjans di socors… jerino i Sant Bernarts vuê buinore, te base?… o ai di lâ fûr de situazion, no pues fâ nuie… o ai di pensâ intun altre robe… mierde!… o ai di movimi!, parcè no puedio?… o scloparai di rabie!… o ai let une volte che chei là che si pierdin te barascjams a muerin no par colpe di bestiis o di elements ma di vergogne… jo… o morarai de impotence!

di ***
#1***