Nassi

Valà, i disè la vecje. Tu sâs ce fâ. La zovine, racuelt il so fagot, e fasè un segn cul cjâf e po si incjaminà ben planc. Trê oris di strade par rivâ sot di un grant frassin nudrît di un riul di aghe limpie, contornât di cisis che a fasevin di ricès. La cjaminade lente da la zovine e la sô panze a mostravin une cundizion prossime a parturî. Gran part dal troi e jere esponude al soreli de matine, bisugnave spesseâ par cirî un pocje di ombrene e di ripâr.  E sintive il fantulin ripâ plui fuart dal solit, come se il desideri di parturî da la mari lui, lu percepìs. I varès plasût che al fos mascjo, biel e fuart, come so pari. Lu veve conossut une fieste e subit si jerin inamorâts. Parturî no la spaventave, dutis lis feminis de sô famee lu àn fat, cun dolôr, ma dopo dut al passe.
Di lontan e viodè l’arbul vivarôs, dulà che la ombrene e varès dât solêf ae zovine e la jerbe frescje e varès fat di cove. Rivade, si sentà poiant la schene sul tronc, e mangjâ trê fics e un glotâr di aghe. Il cidinôr e i profums a jerin par la zovine une biele compagnie.
Lis primis doiis no tardarin a presentâsi, e saveve che la intensitât dal dolôr a sarès aumentade par grâts. Si preparà cirint di concentrâsi sul da fâ e sul so respîr.
Tal moment just si tirà sù in pîts, e poià la schene sul tronc, e slargjâ lis gjambis, e fasè un pôcs di respîrs profonts par vê un ritmi e favorî la espulsion. Pôc dopo, e cjapà il so frut tes mans viertis e subit lu strenzè dongje di sè, sunsurant al piçul: “tu sês il benvignût su cheste tiere, che come une mari eten adun ducj i siei fîs. Achì tu cjatarâs il fûc, la aghe, l’aiar, ogni gjenar di pomis, tu cognossarâs la fature e la gjonde, ma visiti che no tu sarâs mai bessôl. Io ti promet che e varai cure di te. Ti insegnarai il coragjo e la armonie, il rispiet e la volontât. Fevelarai al to cûr par che tu imparis a volê ben a ogni creature”.
Po dopo, si direzè viers il rìul, e tirà fûr dal fagot lis jerbis prontis par mastiâ, e taià il cordon, e lavà il frut e se stesse, e de di tete al piçul e lu involuçà.
Prin di partî si sentà poiant la schene sul tronc, e polsà, e zirant il pinsîr al Creatôr e preà come che i vevin insegnât: “Mi rivolç a ti, Creatôr Valent dal Univiers, paron e re. Ti mostri la creazion che tu âs volut gjenerâ dentri di me, da la cuâl no soi parone ma dome custode. O sai che simpri tu mi scoltis e tu mi compagnis sul troi de vite. Judimi a no pierdi la fiducie e a cjaminâ cui voi limpis e cun umiltât”
Intant il soreli al veve scomençât a calâ e jê e veve prometût di tornâ cjase prime di sere, alore e cjapà il troi slungjant il pas. Il piçul lu veve sostignût cuntun grant façolet, peât daur de cadope, cussì ai leve ben di rimirâlu e di dâi di mangjâ. Dilunc il troi l’aiar, in ca e in là, al faseve mulinei e al puartave profums di salvie e osmarin salvadi.

di Gaetan Cogôi
#1***

2 comments