LCPBDM #6.1 – Divinitâts

La passion pes personis no si comande. Tu, almancul, no tu le âs mai comandade, soredut cuant che chês personis a son artiscj. E par artiscj tu intindis int che e messede cualsisei forme di art. E ti pâr, ti è simpri parût, cuasi un paradòs che tu tu sedis fat cussì, passionâl e sdrumant – no tu savaressis altre maniere di piturâti – cuant che si trate di arts.

Tu che no tu sês un espert di nuie, no tu sês un artist, no tu vivis intai cantins des arts. Tu sês un operari che al passe lis oris de plui part de setemane intal mieç dai imprescj e dal davoi di une açalarie, turni dopo turni. Ma tu sês ancje un che al à passions, e lis passions a no àn paron. Tu podaressis scolpî une mont Rushmore lungje dutis lis Alps furlanis cu lis musis des tôs passions. Tu varessis divinitâts di prestâi a dutis lis religjons dal mont; divinitâts concretis, che a àn fat robis concretis, che in tancj câs a podaressin fâ altris, stant che son inmò vîfs e creatîfs. No saressino plui bielis lis religjons dulà che si gjolt, cence adorazion e cence preieris, dai lavôrs di… ce saio, di Banksy, di Will Eisner, di Beksiński, di Sendak, di Buzzati… Tu podaressis lâ indevant cuissà par trop.

Ma la robe che plui ti plâs, di chestis divinitâts, e je cuant che a tirin fûr alc di scalembri, di diferent, di fûr di scuare. Alc che no tu disaressis mai. Tu ti visis ancjemò cuant che ti è capitât la prime volte. Cuntun cjantant che al è discomparît, parcè che al jere clâr che al jere un masse dolç e delicât e tenar par chescj agns di tristerie e cumò, – ogni tant tu tal domandis – cuissà ce fin che al à fate. Ma ta chê volte, cuant che tal mieç di dutis lis cjançons plenis di dolç e melodie e amôr di chel disc maraveôs al à tirât fûr un toc cussì, diferent e cun dentri une rabie gnove, no tu âs capît plui nuie. E jere pardabon la cjançon plui biele dal mont.

ME, MY YOKE + I, Damien Rice; 9 [2006] 5’57”

Chest toc lu cognossin soredut i plui vecjos e soredut se, uns vincj agns indaûr, a scoltavin il disc di Damien Rice, un cjantautôr irlandês che pardabon al è discomparît, a nivel di musiche gnove. Lui al è vîf, al è passât ancje al teatron di Udin, cualchi an indaûr, ma daspò dai prins doi discs, tai prins agns zero, e dopo la roture sentimentâl che al vude e il sucès, al à fermât di burî fûr musiche gnove, stant che il tierç e ultin disc al è dal 2014. Noaltris o vin scoltât une moscje blancje de sô produzion, ven a stâi Me, my yoke + I, dal album 9, dal 2006.