LCPBDM #5.2 – Vuidâ di gnot

Image by upklyak on Freepik

Vuidâ, di bessole, par strade, di gnot, ti à simpri judât a pensâ.
Tu sês une di chês che no à fastidis, a fâ chilometris, tal cidin dal scûr sbusât dome dal ‘sisinâ de tô machine e de musiche a bas volum.
Musiche cuiete, come che tu sês cuiete tu, come persone e spirt.

Da rest, al è un dai motîfs che ti à puartât a sielzi chel lavôr, che ti puarte vie di cjase par doi o trê dîs a setemane, ca o là, ator pal nord Italie. Pôc ti interessave se ti disevin che nol jere lavôr par feminis, o che al jere miôr se tu vessis viazât cul tren o cui flixbus.

No lu fasarai mighe par simpri, tu rispuindevis, e po’ par cumò no mi coste fature, passâ chês oris in machine. Ma no jere vere. Nol jere ce che tu pensavis pardabon. A ti, ti plaseve, che timp passât a cjalâ il lusôr dai tiei fanâi. Tu metevis in rie i pinsîrs, lis robis di fâ tal indoman, chês fatis la dì prime. Tu resonavis suntun libri let, o sui discors fats cuntun client, o su lis robis dal mont parfin. A jerin i moments che tu ti sintivis tu, inte tô nature plui sincire.

Dome in chei ultins mês tu pierdis plui timp telefonant al to murôs, che ti spiete cjase e che aromai tu scomencis za a spietâ di viodi ancje tu, indurmidît sul divan cul gjat su la panze. E la idee di chel incrosâsi, stracs ducj i doi, a straoris, par bevi un lat cjalt denant dal seglâr e contâsi alc e po lâ subit tal jet, si fâs simpri plui strade, su chê tierce corsie che tu tegnis di fis.

E cussì ti capite di scjampâ vie cui pinsîrs cuntune vôs di femine che no tu cognossis, ma che tu capissis che e cjante di un desideri di amôr. Tu rivis juste a shazamâle, par podêle tornâ a scoltâ… E ti fâs un efiet strani. Tu volaressis jessi za rivade cjase. E no ti jere mai capitât.

E intant che tu tornis a meti la cjançon dal imprin, tu resonis sul fat che in dite a stedin cirint un responsabil pal ufici di marketing, lavôr che tu savaressis fâ ben, stant simpri daûr de scrivanie…

SAD DAY, Fka Twigs, Magdalene [2019] 4’15”

Chest toc, invezit, al va un tic plui indaûr, ma no masse. O sin tal 2019 e intal disc Magdalene, di FKA twigs, che e je une cjantante inglese, ma ancje balerine e ativiste, che e messede eletroniche e sunôrs ancje avonde sofisticâts cuntune vôs une vore adate a chestis atmosferis che a fasin cuasi tornâ ai timps dal trip-hop di Bristol. La cjançon che o vin sintût e jere forsit la plui melodiche di dut il disc e si clamave Sad day. E se us plâs FKA twigs e je fûr cul disc gnûf propit in chest an.