LCPBDM #4.4 – Il pop

Discuti al è biel.
Fevelâ, confrontâsi, cirî provis e esemplis e argoments par puartâ la discussion des bandis che tu crodis che e vedi plui sens o magari, adiriture, cambiâ idee, scuvierzi cantins diferents e cjalâ lis robis cun altris prospetivis.

Tu la pensis cussì di une vore di timp.
Tu âs vude simpri la idee che e sedi stade chê la cualitât che plui di altris e à puartât a la evoluzion dai umans. Almancul di chei civilizâts, metìnle cussì. Da rest, no ise la mancjance di cheste capacitât la piês plaie di chescj ultins secui? Tu tu crodis intal confront, inte dialetiche, te politiche adiriture, ancje se cuant che tu lu disis, in taule cui amîs, o cui colegas di vore, ti ridin simpri e a tachin cu lis batudis e il cualuncuisim di ostarie, e pôc ti console che par solit, pardabon, tu sedis cun lôr intune ostarie.

Cualchi volte alore tu molis il colp e tu lassis pierdi. Ma cheste volte no.
No tu puedis sierâle li, chê discussion cun Paulut, su la musiche pop.
La musiche pop e à di jessi semplice, stupide, orecchiabile, e plasêi a ducj, cuntune struture simpri compagne di strofe ritornel, bridge, strofe ritornel e vie, dopleament di ritornel par sierâ la cjante in glorie. Ma stino scherçant?! Va ben che par solit al è cussì, ma tu tu sâs ancje che al è un univiers di cjançons che a son cussì, ven a stâi, pop, ma che a no son stupidis, no son banâls, no son semplicis, e no plasin a ducj ma… a scoltâlis, in veretât a podaressin. Dome che la int no lis cognòs.

Ti covente dome la cjançon juste, di fâi scoltâ a Paulut, par che al capissi che no je cussì, e magari fâi discuvierzi un mont e fâi cambiâ prospetive. E tu la cjatis, la cjançon biele di dulà tacâ a fâi discuvierzi chel mont.

NO FRONT TEETH, Perfume Genius, Glory, [2025] 4’46”

E ca o vin tirât dongje une cjante di un che si clame Perfume Genius e che al à fat une vore di lavôrs, tipo 7 discs, e che a son ducj biei di discuvierzi, pûr pûr che nol sedi un che al fâs passâ lis cjançons par lis rotazions di radio comerciâls. Al è merecan, dal ’81, e al à tacât a fâ musiche tart, cuant che al è lât a stâ a NY, tal 2008. Il toc si clamave No Fronth teeth, e lu vin cjolt al ultin lavôr, Glory di chest an.