LCPBDM #4.3 – Meti a puest

Miarde! Miarde! Miarde! Miarde! Tu pensis.
A vevin dite che a tornavin doman di sere. A vevin dite che si fasevin la zornade a Lignan a lassavin lâ vie il trafic de domenie, si mangjavin une pizza e un gjelato o ce dal diaul e dopo a tornavin. Tô mari, to pari e tô sûr piçule, e invezit, miarde! No! Ti àn scrit a siet e mieze di matine che “Qua è brutto tempo, facciamo colazione e partiamo”. E alore miarde!

Miarde parcè che tu tu vevis ancjemò di lâ a durmî.
Tu cjalis la sale e a son butiliis vueidis ancje tai vâs di rosis, patatinis e bagjigjis par ogni cjanton, e un devasto totâl di ogni bande, comprendûts i veris di un pâr di tacis e il tocjo de bire che e jere dentri. In cusine il Jack al à parfin tornât fûr sot de taule, e no, il Jack a nol è il to cjan! E alore miarde ancje a lui, che i vevin ben dite di cuietâsi cun chel altri Jack, chel de butilie. Eh ma no ûtu, la serade de aste dal Fantacalcio e je speciâl, un brindisi al Bomber, che si è puartât vie Cahtanoglu par doi credits e un al Marcut che come un coion a ‘nd à spindûts 30 par meti in rose chel sclapeçocs di Scamacca, che al fasarà panchine dut il an. E po dopo, Ma vino di clamâ lis chei altris dai, al è adore! A son pene saltâts fûr de disco, e vie, la cjase plene di int e di fum. E po, dai, fasìnsi une pastesute ancje se son cinc di matine, no utu?

E cumò tu vâs fûr di cjase e a son plats di spaghets cul sugo in scjatule ator par dut il zardin. A fâ la paste di cjocs e ven simpri un schifo, si sa. Ma tant i tiei no sono vie? Eh, si, tu pensis, tu âs dute la zornade par meti a puest. E invezit… E invezit tu varâs sì e no un pâr di oris, sperant che a cjatin trafic par strade o che il camarîr i fâsi colâ il capucin bulint su lis valîs!

Nol è timp di pierdi. I vûl metude une cjançon che ti dedi il ritmo e tacâ meti a puest dut il plui svelts pussibil. Tirâ sù il volum dal stereo di spacâsi lis orelis e metile in loop. E tu sâs ben cuale che e je, la cjançon juste!

MY ENEMY, The Afghan Whigs, Black Love, [1996] 3’10”

Par cheste cjançon plui biele o sin lâts une vore indaûr tal timp, cuasi trente agns indaûr, stant che il toc My Enemy, al è dai Afghan Whigs, un storic grup dai agns ’90, e al jentre in plen intes curints dal rock energjic e cence nainis di chei timps. Il disc al jere Black Love dal 1996 e la cjante e je dal sigûr une di chês cuntun atac plui rabiôs e ben jessût dal periodi. Il grup, par altri, cjapitanât di Greg Dulli, si jere disfat tal 2001, ma a son tornâts dongje e cumò al è ancjemò in ativitât e al jes ancjemò cualchi biel toc, se us plâs il rock di chei agns.