LCPBDM #3.3 – Funerâl

Tô none e je muarte e tu âs di lâ al funerâl.
No tu âs cuasi vaiût, cuant che tu âs savût, juste cualchi lagrime spauride. Tu âs vaiût di plui cuant che ti àn cjapât sot il gjat, denant di cjase.
Tô none e jere viele e tu la viodevis da râr, masse cjapade, dai compits, dai fantacins, des amiis, di instagram e dai tiktok di fâ. Il gjat invezit tu lu figotavis ogni dì e al durmive cun te.

L’Enterrement – Édouard Manet

Tu ti sintis triste, par chescj pinsîrs. Ti pâr che ducj, ator di te, a sedin bogns di leiti tal cjâf, tes pipinis platadis daûr dai ocjâi neris.
Se a savessin, tu pensis… Se a savessin che tu no tu varessis nancje voie di jessi li, tal cjalt, framieç di chê int vistude a neri, a sintî un plevan che al lei frasis cence sens. Ma si scuen, tu pensis. O almancul, ti àn dit cussì. Ma tu tu varessis miôr sei lade al mâr cu lis amiis, in coriere, parcè che forsit e je une de ultimis bielis zornadis prin di tornâ a tacâ scuele. E par un marilamp tu âs cuasi odeade tô none, che e je muarte cussì a colp, doi dîs prin.

La vôs tes tôs cufis si alce, inmagant, e al è come se e compagnàs tô none intal so ultin viaç. E tu sês contente, di vêi fat sintî, in cualchi maniere, la cjançon plui biele dal mont.

BABYLON, Tamino, Every Dawn’n a Mountain, [2025] 5’41”

La cjançon buine par un funerâl e je gnove di chest an, cjolte di un cjantant zovin e ancjemò pôc cognossût. Lui al è Tamino, al ven de Belgjiche, ma al à divignince egjiziane, al à une muse che e somee la biele copie di Tananai e difati al à fat ancje il model. Ma disìn che cun chê vôs che si cjate, se al ferme di ispirâsi a Jeff Buckley, al fasarà ancjemò une vore di robe biele. La cjançon e jere Babylon, il disc, dal 2025, al jere Every Dawn’s a mountain, che al è il tierç ma dal sigûr chel plui madûr.