LCPBDM #3.2 – In grave di gnot

La mancjance, in amôr, al è forsit l’amôr, tu pensis. E se l’amôr al è mancjance, alore forsit al è une bausie.

Ma il mâl che tu âs, il grop tal cuel, il sburtâ dal cûr daûr des cuestis, no son bausiis. Tu lu stâs provant su la tô piel slisse di zovine, sui smursiei che nol passe dì che no fasin puest a trois di lagrimis. Si puedial stâ cussì mâl par un morôs? Sì. Sì parcè che ancje lui par te al stâ mâl compagn, tu lu sâs. Tu lu sâs e sal sês scrit, sal sês dite, o vês vaiût insiemi, daspò di vê poiât il telefonut.

Shooting Stars In The Sky – everythingsartmdh

Ma il destin al vûl che no stedis dongje, e che un ocean si sedi metût tal mieç. Une borse di studi, une ocasion di lavôr, une sielte dificile, ma clare. Si clame vite. E no sês cussì çondars di crodi alle “relazioni a distanza“. O sês pragmatics, sincîrs, inteligjents. E nol è pe sdrume di trente che o vevis sui librets de universitât. O savês cemût che a van lis robis e ce che al vûl dî jessisi cjatâts ma dome par un toc di strade. E si sês lassâts.

Ma la mancjance, istès, ti sdrume il cûr. E cussì par fâi cuintri tu ti sês lassade convinci dai amîs a chê gridelade di gnot, parsore dai claps de grave. E tal imprin ti pareve cuasi di sopuartâle, chê mancjance. Ma a jerin bastadis un pâr di biris par disniçâti lis lagrimis, e tu jeris scjampade dal trop, tal scûr, dongje dal cisicâ de aghe, cu la scuse di lâ a pissâ. E propit cuant che tu ti slontanavis, parsore des vôs, e partìs une cjançon. E ti jentre dentri, e ti jemple di tenarece, e lis stelis di Sant Laurinç, adalt intal scûr, prontis a colâ, ti pâr che ti cjalin. E tu viodis lis robis intune altre maniere, tu viodis chel toc di strade fate insiemi come un insiorament, une maravee, une biele robe che ti è capitade.

E su chês notis, su chê vôs di sirene, al è come se il pês sul cûr al vegni alçât sù, di chel cjant. Il plui biel dal mont.

ESPECIALLY ME, Low, C’mon [2011] 5’28”

Ta cheste cjançon o vin sintût une vôs che magari cussì no, di pôc, no je plui e a sintîle, savint di no sintîle plui, ti fâs simpri vignî i pêi drets. Lôr a son i Low, a jerin in doi, Mimì Parker e Alan Sparkhaw, e lui daspò di jessi restât vedul al à za tornât a fâ musiche biele. Ma la cjante Especially me, invezit, e je stade cjolte di un disc vieri, dal 2007, che si clame C’mon e e jere un classic dal lôr repertori. Su cheste cjante al è pôc ce dî parcè che al sarès masse ce dî, disìn dome che se un nol cognòs i Low al da motîf di invidie grandonone, parcè che al à un mont di cjançons plui bielis dal mont di discuvierzi.