LCPBDM #3.1 – Murî di incident

Prin o dopo al capite a ducj, e cumò ti è capitât ancje a ti.
E il mâl che ti fâs, pierdi une persone intun incident di strade, e je dome une cuistion di distance. La distance che e jere in chel moment jenfri di te e chê persone li, che bot e sclop e a tirât l’ultin flât intun davoi di lamieris.

Ancje cuntune stesse persone al pues capitâ che lis distancis a sedin diferentis. Un amì, par esempli. Un amì che di piçul tu lu viodis ogni dì e plui voltis al dì, vûstu a scuele, vûstu tal cjamp di balon, o daûr de glesie o tal bar o in cualsisei altri puest dulà che tu sês usât a cjatâti cun lui. Ma cressint lis amiciziis a son tant che elastics, buinis di slungjâsi di timp e di chilometris, cence spacâsi. Un si cjate a vivi intune altre citât, intune altre realtât, e la distance e je diferente. Si slontanisi.

Mourning and shadows – burgia

E ancjemò plui lontan al è un amì dal to amì, che magari tu âs cognossût pôc, viodût dome cualchi volte, e che no tu sês rivât adore a fâtal plasê. Parcè che tu tu sês simpri chel, e lui, invezit, nol è plui lui. E i siei amîs no podaran jessi mai i tiei. A partegnin a une realtât diferente. Ma tu no tu la capissis e cussì no tu rivis a tamesâ il mâl che al à lui, che al à pierdût chest amì intun incident, chest amì che tu tu cognossevis, sì, ma no di dongje.

E tu volaressis intivâ miôr chel dolôr, chel malstâ, chel vueit che al è vueit dome intune realtât lontane. Tu volaressis intivâlu miôr par stâi dongje al to amì, cu la sinceritât e la distance che o vevis un timp. E al sucêt che ti jude lui. Ti mande une cjançon. Al è rap, ti dîs, lu sai che no ti plâs, ma scoltile istès. E tu tu scoltis e tu capissis dut, cun pocjis peraulis businadis.

La distance, bot e sclop, e torne pocje, e par te, chê li, e je la cjante plui maluseriose e plui biele dal mont.

’NA NOTTE INFAME, Piotta Assalti Frontali, ‘Na notte infame [2024] 3’45”

Cheste cjante plui biele dal mont e je di un di divignince Teôr che di cognon al fâs Zanello e e cjante propite di so fradi muart. Lui al è il Piotta, e in chest toc dal so disc al cjante insiemi cui Assalti Frontali, che a son un grup storic di Rome, tra i prins a fâ hip hop par talian e une vore militant. Il disc si clame come la cjançon, ‘Na notte infame, e se a cualchidun, a sintî il non Piotta, al è vignût tal cjâf alc di vieri, al sarès ancje ore di smenteâlu e tornâ tal presint, stant che il disc dal 2024, a tocs, al è une vore maluseriôs, roman e biel.