LCPBDM #2.4 – Murî

Sâstu cuâl che al è il pinsîr che ti remene plui il cjâf cuant che tu âs passât une cierte etât? Cuant che tu ti inacuarzis che il timp e la cualitât di ce che tu âs denant a son plui bas e curts de cualitât e dal timp che a vignaran? Su mo, sù. Al è pôc ce contâsi fufignis. Il pinsîr che ti rive dongje, cence tucâ su la puarte dal cerviel, al è simpri chel. Murî.

Arne möter Döden – Lars Vega

E cumò che no tu sês rivât ancjemò ai setante ma tu tachis a jessi un om cui fastidis che a corin ca e là dal cuarp, dai zenoi al stomi, dal flât al vues rabiôs, o de cadope ai picjecjacis… ben, cumò tu i pensis dispès, a chê robe li. E no in maniere maluseriose o sglonfe di ingôs. No. Tu i pensis in maniere pragmatiche, sclete, come un alc che si à di meti in cont e che e je rivade la ore di resonâi parsore. E ti capite plui spes intal cidin.

Cuant che tu studis la lûs e tu pois i ocjai e il libri sul comodin, par durmî.
O cuant che tu sês che tu disfis il zucar intal cafè, te cusine vueide des sîs di matine.
O cuant che tu restis sentât su la bancjute intal curtîl, sot dal cocolâr, cu lis bestiis di stagjon che a pandin il lôr cjant e il fum dal spagnolet che si intortee tes ramascjis.

Cemût isal murî? E soredut, ce sucedial dopo? E no a chei che a restin, intindìnsi. Su chel si pues fâ ipotesis une vore precisis. Tu tal domandis soredut rispiet a ti, al to jessi, al to pensâ, ae tô maniere di messedâti intal vivi. E par rivâ a pensâi ben, cu lis justis emozions, cul clime adat, no si varès di fâlu intal cidin. Si varès di vê sot une musiche, une cjançon che ti puarte dentri chescj pinsîrs inte juste maniere.
Forsit al è par chel che tu scoltis dispès lis cjançons gnovis dai cjantants vecjos. Dal sigûr, tu pensis, lôr no puedin no vê pal cjâf il to stes pinsîr.

E in efiets, tu âs reson. Vele ca, la cjançon che tu cirivis, la miôr par compagnâti i i pinsîrs. Dal sigûr, la plui biele dal mont.

WHERE DO WE GO WHEN WE DIE?, The The, Ensoulment [2024] 4’02”

E cheste cjante e je propite une cjante resinte, dal 2024, ma di un grop nassût dal 1979, i THE THE. Il titul, ma ancje il test, a fevelin propite di chê robe lì… WHERE DO WE GO, WHEN WE DIE? Ma lu fasin intune maniere che no je maluseriose, ma cuiete, che ti compagne. Une ghitare che no à nuie di straordenari, e la vôs di Matt Johnson, che in pratiche al è l’unic pont fis dal grup, che ancje jê e je invecjade, plui cuiete. No sarà une cjante origjinâl, ma metude dentri tal disc ENSOULMENT, che al rive daspò di 14 agns di chel di prin, e cjapade intune cierte maniere, ancje cheste e pues ancje deventâ la cjançon plui biele dal mont.