LCPBDM #2.2 – Restât a pît

Ben po… Tu sês restât a pît. A pît cu la machine. E no parcè che si è rote. Ma come un çondar tu sês restât cence benzine. E il biel al è che tu lu savevis, che al podeve sucedi. Tu vevis fat za trente e passe chilometris te sere prime, e vuê matine tu sês lât a vore. E cumò tu vevis di lâ al calcetto e boh… metio 10 euros al automatic e doman il plen cu la tessare? Ma no… tu ti sês dite che tu rivis. Par lâ fin a Cussignà nol è mighe lontan? Doman matine tu le fasis al IP ca dongje, li dai indians, ancje se e ven un fregul di plui che di altris bandis. Ma cu la tessare tu stâs dentri.

Tu vevis resonât cussì e invezit… il motôr che al barbote e POF, fer a trê chilometris di cjase, a miezegnot mancul alc. E cumò? Sì, bon, clare. Si podarès clamâ cualchidun… tipo chei dal calceto a varan ancjemò di rivâ cjase e dal sigûr no son a durmî. Ma boh… e je une sere cussì clare, cu la lune parsore di te che e pâr un frico di chei bogns. E a cjase tu sâs di vê la taniche di verde dal seejerbe.

Man Walking Towards Red Moon – SanShow

Une volte no ti sarès nancje passât pal cjâf di clamâ cualchidun… par trê chilometris! Di gnot, cjaminâ sot la lune, tal cidin dal scûr? No tu podevis jessi plui fortunât! Pues crodi… E alore… ve li, dai, fûr lis cufis, e prime di meti il telefonut in sachete e sierâ la machine, tu fasis partî la musiche.

E nancje a dîlu e tache la cjançon juste par cjaminâ tant che un danât in plene gnot! E tu ti inviis, al pas cu la vôs di chel li che al cjante di no tu sâs nancje ce. Ma no son dubis… che cumò, cheste, e la cjançon plui biele dal mont

LITTLE SISTER, Queens of the stone age, Lullabies to paralize [2005] 2’54”

I QUEENS OF THE STONE AGE, daspò dai fastidis di Josh Homme, il cjantant e ghitarist, a jerin ator par l’Italie che nol è tant e al pâr che a sepin ancjemò petenâ la int cun fusiladis come cheste LITTLE SISTER che o vês sintût. E lôr a saran ancje dai vielis, cui pîts ben inlidrisâts intai agns 90 e intal teren di Seattle, ma al pâr che a vedin inmò alc ce dî e lu disin, par solit, in maniere avonde rumorose. LITTLE SISTER al è un dai tocs plui tirâts e rabiôs di Lullaby to paralize, disc dal 2005. Po dopo, i QOTSA di tocs cussì ind àn scrits une vore. Al vâl la pene lâ a cirîju, massime se o vês di cjaminâ di bon pas.