Marie Lissandre (Scjaraçule Maraçule)

Lis seris di Mai ca jù te basse furlane, son cjaldis e tacadicis. Mê agne Marie, clamade la “Lissandrine”, di Palaçûl come me, a disin che je un pôc strambe. Je vedue, ma no in etât. A mi prime gnece, vuleve a ogni cost metimi non Sabide, ma mê mari lafè nô! cussì mi clami Lisute. Cuant che o voi a cjase sô, dispès le cjati a balâ, che a zire, cu la sô cotule colorade, come in ruede, cun corais e braçalets ad ôr di polsins e canolis, e zire e zire, discolce, petant sul tamburel che al sglinghine come bronç di campanel. E cjante sotvôs intune lenghe che no cognòs, come i predis a gjespui, cun sunôrs di tiere lontane, prometude e pôc gjoldude. Cuant che si ferme dute sudade, si sente, e par cualchi minût je intrunide. Une dì mi dîs:

”Ven ca Lisute, scolte chiste storie: Il gno non vêr l’è Myriam, come la profetesse dal Esodo, cuant che ju Ebreus a scjamparin dai Egjizians che a forin glotûts dal Mâr Ros. Di ete in ete, di femine in femine, chest non, pôc ricuardât in glesie, cui siei rituâi l’è rivât fint a mi! O ai podê di vuarî int e nemâi, clamâ la ploie, sfantâ il burlaç, preservâ la racuelte de campagne. Tu sâs che o soi vedue, e cence fruts. Se tu ti fidis ti fasarai scuele dal gno savê, cussì la glagn no si çoncarà. Daspò de Pasche Maiôr (Pasaç) e rive la Pasche Fluride, fieste de seseladure, o Pentecoste pai cristians di Rome. Si pree il Spirt di Diu che al resti cun nô e nus dei bondance, vite, e no dome “vitis”. La sere de vilie di fieste, vie pe gnot, si bale e si cjante, oms e feminis in coro. Mi plâs tant Scjaraçule Maraçule, che o ripetin a rote di cuel intant che o metin in muel un “Scjaraç” une vuarzine dal lunc tamon, te aghe vergjine e clare de risultive dal Stele par propiziâsi il racolt de stagjon. L’omp al lavore la tiere, je si fâs lavorâ; l’aghe le imbombe, je si fâs fecondâ. Se i bruts spirts si fasin dongje cui “Maraç” di fenoli salvadi ju pachìn par slontanâju. Si cjante e si bale fint a “marcolâsi” pal inzirli. Il cuarp al sta ben e il spirt si racree. E àn provât cun ogni sorte di torture a fânus dî che no je vere che a esistin monts di traviers, par lei la vite, judâ i biâts cjastiâ i caporions, stâ in pâs cul mont. Abiure no je simpri veretât ma estorsion, cussì o vin gambiade mondure ma no mission. No stâ spaurîti, fiditi, tu impararâs. Rispiete aghe, fûc, tiere e spirt, lôr saran il to completament. No stâ fâti imbroiâ di cui che ti promet, patint, l’aldilà e si gjolt, rutant, ce che l’è di ca. E cumò bussimi trê voltis.”

E fo denunziade al tribunâl de Sante incuisizion di Aquilee ai 10 di Jugn dal 1624 insieme a atres 11 feminis par ”falso ed insano comportamento di alcune fedeli e per impetrar la pioggia dal cielo la notte di pentecoste alle hora 5 di notte”. Pôc timp dopo je sparide, ma ogni tant jo, bessole, o bali cul so tamburel!

• Liberementri gjavât fûr di cualchi cjapitul dal libri “Viaggio nella notte della chiesa di Aquileia” di R. Paluzzano G. Pressacco.

di Stiefin Asquin
#1855

1 comment