Ondefrute: Lupo Manarie intal spazi

Lupo Manarie si jere sveât e si jere cjatât dentri di une capsule di veri!
La capsule si jere vierzude e te stanzie e jere jentrade une sienziade.
«Hallo Mister Manarie, Good Morning! We have a planet to discover!», e veve dite.
E in chê Lupo Manarie al viôt che ator di lui al è plen di altris sienziâts che a tachin a dâi istruzions.
«O vês di lâ a cognossi i aliens dal planete Plere, che a bevin velen di matine fin sere!»
«O vês di capî i aliens dal planete Cudumars, che invezit di fevelâ a dan dome i numars!»
«O vês di fevelâ cui aliens dal planete Zugatul, che ogni robe che tu i dâs par lôr al è un garbatul!»
«Bisugne imparâ a mangjâ lacais e grisons, se volês vivi sul planete dai Sporcacjons!»
«E no vês di smenteâsi di metisi un cjapiel fat di urtiis, par deventâ amì di chei dal planete Vissiis!»
«E al covente ancje imparâ a cjaminâ suntune man, par podê vivi sul planete Mataran!»
«E al sarès ancje di fâsi cressi lis alis, par discori cun chei dal planete ConteBalis!»
«VONDE!» al veve rugnât Lupo Manarie, che nol veve propite voe di viodi nissun di chescj aliens.
E pûr, cjalant pal oblò Lupo Manarie al veve viodût che la astronâf e stave aterant sul prin planete.
«Ma scusait, isal propite necessari che o ledi a cognossi ducj chescj aliens?» al veve domandât.
«Mister Manarie! You are the best astronaut in the world! Only you can do this!»
Lupo Manarie alore al jere smontât suntun planete dulà che lu spietave une sdrume di omenuts cu la muse di budiese e ancje il stes odôr.
«MANDI ALIENS! US COVENTIAL UN DEODORANT?» ur veve domandât, e chei a vevin tacât ducj a rabiâsi.
E intun lamp ducj i aliens a vevin tacât a fâi cuintri, e… Lupo si jere sveât di bot… tal jet di cjase sô!

di Rafaêl Serafini
#1851

Scolte la storie lete dai fruts del Primarie di Rivis d’Arcjan!