Ondefrute: Lupo Manarie al devente…

Lupo Manarie si jere sveât e si jere cjatât denant dai voi un predi.
Ma no un predi normâl. Al jere un Vescul, vistût cuntune grande gabane blancje e cuntun cjapiel taront e colôr ros.
«Sua Santità, e je ore di jevâ, o vês tantis robis di preparâ!», i veve dite chest Vescul.
E la cjamare e jere plene di altris Vescui e di plevans e di suoris che a vevin tacât a fevelâ.
«O vês di lâ fin a San Pieri e par strade bisugne lâ planc che al è dut un veri!»
«O vês di preparâ il discors, e no vês di contâ chê dal ors!»
«O vês di vistîsi cul gabanot, no podês mighe presentâsi crot!»
«Bisugne imparâ ogni preiere a memorie, se volês jentrâ ta la storie!»
«E no vês di smenteâsi di meti i cjalçuts di pêl di pantiane, che bisugne tignîju sù une setemane!»
«E si scugne metisi lis mudantis di cjarte di veri, par vê une muse di Pape une vore seri»
«E visaisi di imparâ il non di dute la int, che a son un milion tresinte e vincje cinc!»
«E mi racomandi, sua Santitâ, di cumò al à di sta almancul vincj dîs cence mangjâ!»
«VONDE!» al veve berghelât Lupo Manarie, che aromai al veve capît che al jere deventât lui il gnûf Pape.
Al veve cjalât fûr dal barcon e al veve viodût che la place di San Pieri e jere plene di int che lu spietave.
«Ma parcè fevelaiso ducj in rime e par furlan? E ce aio di fâ cumò?» al veve domandât.
«Sua santità, spesseait a jevâ, al è il popul dai fedêi di saludâ!»
Lupo Manarie al jere lât sul puiûl, e al veve slargjât i braçs e al veve businât a dute la int…
«MANDI BIEI! CEMÛT SINO?» e in chel moment si jere sveât, ma cheste volte… tal so jet!

di Rafaêl Serafin

#1850

Scolte la storie lete dai fruts de primarie di Rivis D’Arcjan!