Cai e lacai

La diference jenfri cai e lacai, par furlan, tu la imparis di piçule.
Cetant piçule di no visâti nancje cuant che tu âs provât il prin lancûr, par vê tibiât un caiut cence savê, jù pal troi che al mene daûr dai orts, a cjase dai nonos, dulà che di scuindon tu lavis a robâ lis trisculis.
E ancjetant piçule di no visâti la bave lichignose dal prin lacai cjapât in man, cence savê, te jeche dal lidric, platât sot di une fuee inmò lustre di rosade, e daurman butât vie, cuntune sbeleade di fastidi.
Za di chê volte i cais ti plasin, a tu i vuelis ben, tu ciris di no tibiâiu e i lacais invezit ti dan fastidi, e si salvin dome parcè che al fâs ingomut sfracheâiu. Se po, a son narançon… cualchidun ti à dit adiriture che a son triscj, parcè che a mangjin i cais.
Ti tocjarà invecjâ une vore par scuvierzi che nol è vêr.
A scuele la fuarpie si slargje. La mestre ti fevele de maravee dal puartâsi daûr la cjasute, dal lassâ une sdrasse luminose di soreli, e intal libri al è simpri un biel dissen di une chiocciola e dai siei vogluts maraveâts parsore dai cuars, intant che i van daûr i siei caiuts. Di chei altris, invezit, nissun ti fevele plui. Se ur va ben, a lis superiôrs, cualchi professôr di siencis al marche la lôr braùre intal sdrumâ gli ortaggi, ma al è plui facil che a sedin i tiei compagns, a gjinastiche, a dîti che sei una lumaca.
E alore tu cressis cussì, su lis pontis di chê fuarpie.
Cirint di jessi cai, ma someant simpri di plui a un lacai.
Di cuant che il prin sen ti slargje lis maiutis a cuant che a vegnin a fâti osservazion pai chilos di masse sui flancs, cence vê inmò vût fruts, aromai che ancje i trente a son restâts avonde indaûr.
No ise ore, ti disin cence dîlu, a ogni sdrasse di lacai che tu lassis.
Di dimagrî, di taiâsi i cjavei, di cjatâsi un om, di fâ un frut, di molâ chel lavôr malsigûr, di meti il cjâf a puest, di cjoli cjase, di cjamâsi su la schene un scus e vivi dentri.
No lu disin ma lu disin. No ise ore… di deventâ cai.
E ancje se no tu i dâs pês, un scus invisibil di colpis al cjalcje la tô schene crote di lacai.
Al sucêt fin ta chê dì che tu cjaminis pal paîs, tal desert dal passaç dal scûr al lusôr. Tu vevis voie di viodi la gnot che si sfantave intal cricâ dì e no tu âs durmît.
E invezit tu viodis lôr.
I cais e i lacais. E lis lôr sdrassis lassadis sul ciment.
Al è scrit alc, ta chêi stralûs. Alc che cumò, cui voi sgarbelôs e i cjavei dispetenâts, tu âs imparât a lei. Parcè che tu âs capît che di chel discors, i lacais a son lis virgulis, i cais i ponts.
E par lei la vite a coventin ducj i doi.
E intun marilamp tu intivis ce che no tu âs intivât par agns.
Tu intivis che tu tu sês fate di virgulis.
La tô sdrasse e je fate di gnots, di feminis, di art, di lavôr, di stelis, di storiis che non àn gracie di sierâsi e meti ponts, ma a van indilunc tal timp libaris e lizeris.
Tu intivis che no tu âs bisugne dal scus, ma tu sês fate par vivi cu la schene crote, sot des stelis de Stradalbe.
Tu intivis che tu sês lacai, e no tu âs nuie di ce vergognâti.

di Rafaêl Serafin
#1847

2 comments