Pixie e Dixie, ce gran maçalizi!

Jo e gno cusin Perìn, di fruts, o jerin trements!
O ai di contâus di cuant che, sul cjast di Braidis di Iplis, o fasevin la cjace a lis pantianis. A man a man che dal cjast si tiravin vie lis panolis metudis a suiâ o i corondui, ve che a saltavin fûr lis suriis. Des voltis a jerin bielis gruessis: insome, a sameavin a pantianis. Ma no pensi che si sedi tratât di “ratti”.
Buh? Cui lu sa? Al è passât cussì tant timp dai lontans agns ’60.
Bon. Si sistemavin in vuaite dopo vê movût lis ultimis panolis o i ultins corondui. E jù! Un cuntune scove e chel altri cuntune pale.
Lis copavin dutis! E ur devin i nons dai cartoni animati.
Ve che al rive Pixie. Cjapilu! Ve che al rive Dixie! Sdrumilu!
Ve che al rive Jerry! Macilu! Ve che al rive Mototopo! Copilu!
Une volte o vevin fat fûr adiriture un vincj di chês bestiis.
Ce grant maçalizi!
Al dì di vuê però mi fasarès impression fâ une robe dal gjenar, cussì “splatter”. Ma za ta chei agns o vevi vût un sintiment di umane pietât. O vevi cjapât une vere pantiane, un Rattus norvegicus, a Iplis, li dal nestri capanon/cuninere dulà che cumò e je la gnove canoniche. La bestie e jere finide intune scjaipule, ma jo le vevi liberade.
Mi samee di visâmi che il pai mi ves cridât. Anzit, forsit lis vevi propit cjapadis…
Il mont al è cambiât, almancul viers des bestiis.
Viers dai cristians… No sai.

di Milio dai Cjans
#1841

1 comment