CC24_Lis Classifichis Definitivis

E nus mancjave un ultin articul definitîf par sierâ dutis lis classifichis de CorseCurte24

Aromai la plui part lis savìn, stant che lis vin bielzà pandudis intal articul de croniche de serade des premiazions (che o podês viodi inte direte fb) e ancje su Radio Onde Furlane cul intervent finâl di Ticât dai Mus (e ancje la interviste al mus che al à vinçût).

Ma o vin di scugnî sierâ come che si conven la competizion leterarie plui maraveose dal 2024 mostrantus dutis lis classifichis cun precision, cun tant di mediis e scarts cuadratics.

Si che, tachìn cun chê di Dicembar, che no vevin dit. Dome 22 mus che a àn partecipât e un teme une vore dificil, stant che o vevin mandât ai mus une selezion di poesiis di poetis furlans, ma cence abadâ tant a cui che al jere l’autôr, si ben a la poesie, che e fos biele e che soredut i plasès al Ostîr, che al à fate la selezion. Se o sês seneôs di savê cualis poesiis no nus coste nuie lassâus il file di podê scjamâ: CC24_Poesiis pal teme di Dicembar

E cence cjacaris vele la classifiche di Dicembar:

O podês viodi che lis primis 6 contis a son ben jessudis e a son stadis o dopradis tal libri, o finidis inte Panarie o letis inte serade de premiazion. E dut câs, a son ancje scritis dai autôrs che a àn dât un biel contribût in dut l’an de corse. Vait a leilis che a meretin, o miôr ancjemò, comprait il libri Tu scrivarâs une conte, che lis cjatais netadis e mioradis.

E se o vevis presint la classifiche gjenerâl o viodarês che Catine la Nere e à sancît il so domini su la corse cuntune ultime prestazion maiuscule, Brene Sfolmenade al à fat il so ancje te ultime tape e Teresine si è confermade musse che e meretave il puest che e veve cjapât. Tra lis sorpresis, dut câs, un risultât une vore bon di Muspilli i à permetût un sorpàs inte ultime curve, e compagn No Ancjemò, che al è rivât a recuperâ, come Derna, un pâr di posizions propit inte ultime tape.

Ma prime di lassâus la classifiche gjenerâl complete us lassin ancje il FantaCorseCurte24 cun MuspilliVirili che e à imbrocade la conte juste di votâ e – vôs di coridôr – gjatemarangule che e voleve votâ chê ma e à scugnût cambiâ par tentâ un sorpàs disperât. Ve ca i numars…

Al va dit, a proposit di scomessis, che ducj i prins 5-6 mûs, a àn pardabon un bon gust e une biele capacitât di sielzi lis contis di bon nivel. Brâfs!

E par ultin, vele la classifiche gjenerâl, cun ducj i detais.

O podês viodi voaltris cemût che e sedi stade pardabon une corse partecipade e ben jessude, cun temis che a cressevin di dificoltât ma che a o crodìn che a vedin puartât ai mus une vore di sodisfazions e competencis, sedi intal scrivi, ma sedi ancje intal pensâ e discuvierzi cognossince e culture. Un batimans a ogni mus dal trop!

E par saludâ, ve il tabelon che l’Ostîr al veve preparât pe serade des premiazions e che al jere stât disvelât a planc a planc.