CC24Novembar#20 – Insomnia

#20 – Insomnia

No duar, mi remeni, ancje usgnot no rivi a durmî lûs.
Al è un rumôr insom dal cjamp daûr di cjase, un rumôr che no mi lasse durmî.
Sdrondene, sgarfe, sgnofre, sgripie… un mungulâ cence recuie che al va indevant par oris.
No sai ce che al è là jù, ma no ai il coraç di lâ a viodi.

Di sîs seris o controli simpri ben la puarte, che e sedi sierade cun sîs ziradis di clâf, e i scûrs dai barcons, che a sedin ducj ben strenzûts.
Dopo o cjali sot dal jet, clâr. Di cuant che o jeri frute, li o ai simpri controlât ogni sere. No si sa mai ce che al pues saltâ fûr.
O voi sot la plete e mi tiri la coltre fin sui voi. Ma ancje di li sot, no pues fâ di mancul di sintî. E intant la creature e sgrifigne, e sbavacje, e sfreole, e smurmugne.

Sigûr, o ai provât cui stropui di cere, cu lis scufis insonorizadis, cu la musiche rilassante, cul rumôr blanc, rose, grîs, maron… Nuie di fâ, no rivi a resisti cun chei argagns. Ancje se jo no le sint, la creature e je simpri là, anzit mi somee che ogni sere e sedi plui dongje.

Usgnot e je la setime gnot. O cjali cun terôr il sbassâsi dal soreli. No pues passâ une altre gnot cussì, ma ca albiercs no ‘nd è. O larai te cjase vecje di mê none: e je vueide e frede, ma un jet e cualchi sfilzade a son ancjemò.
O controli la puarte e i barcons: dut ben sierât. O cjali tal camarin: vueit. Daûr dal armaron: nuie. La pile de aghe sante dai vons mi dà sigurece.
O voi sot des cuviertis e mi met in scolte: dut cuiet. No olsi ancjemò a sierâ i voi, ma planc planc il cidinôr mi involuce e la strache le à vinte. O duar pe prime volte intune setemane.

Mi svee a miezegnot un gratâ di sgrifis su lis breis dal paviment. La çate de creature e ven fûr di sot dal jet. Mi à cjatade. O speri dome di murî ae svelte e di no sveâmi mai plui.

di Stralunade (Muspilli)
#1815

1 comment