CC24Otubar#22 – Scjampâ de vuate

#22 – Scjampâ de vuate

Ce lidrîs puedial vê un pes? Une bestie slichignote, nassude sotane e destinade a finî te bocje di chei plui grancj o te vuate dai pescjadôrs. Elisa e cjale cun smare lis angudelis tal plat e e glot lis lagrimis biel che so pari si supe i dêts complasût de pescjade. Imparâ a contentâsi, ve ce che i tontonin i siei. Ma jê no rive a rindisi di chê preson tra lis cjanis e il palût, sometude a un destin che nol sa nancje che jê e esisti.
E je zovine, Elisa, cun chê fam di muardi la vite e di gjoldi ducj i siei guscj. E je ancje biele, cun chei voi celescj e i cjavei bionts fin tal agâr dal cûl. E inalore le tente, la aventure di scjampâ de vuate. Prime cul campion di balon, po cul fi dal paron de societât, cuntun fotograf, un industriâl…
La fantate e rive lontan, tra lis lûs e il casin da la city, un open space e une cjarte di credit li che si intassin simpri plui bêçs. Fin che al rive lui, dôs voltis plui grant, ma atletic, ninin, premurôs. Il pari che no à mai vût, ma cuntun cont che no si viôt la fin. E si lasse concuistâ. Cuant che e reste incinte e pense che forsit sì, biadelore e pues fermâsi, contentâsi. Ma i baste pôc par capî di jessi deventade une mignestre frede e che lui al à za cjatât cjar plui zovine dulà russâsi. E glot amâr, forsit il piçul al rivarà a tignîlu in buinis. E invezit i da di man, une buine man, si intint, cun tant di vile e aliments a vite.
Elisa e cîr di pensâ. E podarès scjassâ il cuarp denant di un dai tancj. Tornâ a butâsi sul marcjât. Po e cjale so fi, distirât denant dal ipad di ultime gjenerazion, cun chel complet a cuatri cifris. Isal chest ce che e voleve? Il so destin fûr di tîr dai pescjadôrs? Il grop i torne sù pal glotidôr.
E cjape a bracecuel il frut e lu cjarie in machine. Il suv si ferme denant di un casot tra i pavêrs de lagune. Cjalant so fi marcolâsi tal pantan intant che al cîr di tirâ sù une bolpinute cu la cjane di cuant che e jere frute, Elisa e pense che sì, forsit ancje i pes a àn lis lôr lidrîs.

di Teresine la çuete

#1791

Note: opare di Devid Strussiat (land art)