CC24Otubar#18 – Dado

#18 – Dado

Giancarlo Dado al è un omenut su la sessantine, pôcs cjavei rimpinâts tal cjâf e moschetis vanzadis a testemoneâ la ultime forme scure di resistence al sblancjament des sôs spelaies. Une muse cuasit simpri seriose e scunide, soredut di cuant che, siet agns indaûr, al jere restât vedul.
Event chest che al veve amplificât a dismisure la sô storice tendince al lancûr e al marum.
Docent di Storie de art tal Liceu artistic, indiriz arts figurativis. Un docent deprès, si disarès par fâle curte. Dutcâs comprensibil, se si les a cjalâ tai sucrits de sô vite.
Fin di zovin al veve simpri vût une prepotente passion pal studi de arts figurativis. Al golosave di savê dut dai artiscj cun l’intenzion di rivâ adore a lumâ le anime dal proces creatîf, l’intuizion splaçant e soprendent che e veve dât vite aes oparis.
Pene laureât al veve cirût di fâ carriere come critic di art, ma un caratar masse pôc salt par un mont di spes competitîf e venâl, daspò cualchi an, lu veve puartât a cirî alc altri. Al veve cirût une pussibilitât di carriere tal Museu di art moderne e contemporanie de sô citât, ma la culture intune piçule realtât di provincie no je une prioritât. Lavôrs a progjet e contrats a tiermin no lassavin intraviodi prospetivis di stabilitât.
Ae fin la strade par meti sù famee e cjalà al futûr cuntun fregul di sperance le veve cjatade come tancj tal insegnament.
Cun il lâ dal timp, dutcâs, il sens di faliment e l’insodisfazion a vevin fat sù un glimuç di pinsîrs negatîfs che dome Marta, la sô Marta, e rivave adore a sberdeâ. Muarte jê e no vint vût fruts, al restave dome a Brick, il sô cjan, il compit estrem di frenâ il dismontâ, un scjalin par volte, la scjale che e puarte tal vueit e tal scûr.
Tignî sù lezions cence passâ emozions a mularie in plene tempieste ormonâl e il cjâf a dut altri al sburtave ancjemò di plui la idee di vê falât te vite.
“Cos’hai adesso?”
“Arte, due palle…”
“Bon dai, almeno non fate un cazzo…”
Jentrant in classe la enesime conferme. La ultime però. In chê dì lui al veve metût in ordin cjase tant al saveve che nol sarès tornât. E finide scuele il plan al jere clâr: rivâ li di chel ultim passaç a nivel, spietâ e al moment just fa svelt cuatri o cin pas. E po vie a cjatâ Marta par simpri.
Al mancjave aromai pôc ae fin de ultime ore cuant che une fantate e veve alçât la man.
“Prof!” Fuarçant il cjacareç rumorôs dai siei compagns, “PROF!”
“Sì puoi andare in bagno” i veve rispuindudi in automatic.
“No, no, prof volevo farle una domanda”.
Bionde, voi celescj, piercing tal nâs e felpe cun la cape tirade su sul cjâf come usance comande.
“Ho visto su Instagram un murale dove c’era una figura umana, ma che aveva la testa di un cane e leggeva un libro, mi spiega cosa voleva dire quello che l’ha fatto?”
Pe prime volte in dut l’an scolastic le veve cjalade tai voi. No jerin olmis di menadis pal cûl buinis dome par stiçâ il rest de classe a cojonâlu. A voleve pardabon savêlu.
Intun marilamp, denant dai voi a son rivâts ducj i libris che al veve let di chê forme di espression artistiche cussi lontane dai siei prins studis. E subit daûr Brick che i lecâve la man cuant che al vierzeve il sac des crochetis.
“Prof, per favore…”
In chel esat moment il sgrasai fastiôs dal sunâ de campanele.
La muse di delusion de frute si jere sfantade intune ridade luminose cuant che lui prime che e les vie i veve dit cuntun fîl di vôs: “Giovedì porto un libro fotografico e ne parliamo”.

di No Ancjemò
#1787

Note: opare di Mattia Campo dall’Orto (A day in a diary of a voiceless volo, 2019)

1 comment