In chê volte il furlan al ere ancjmò doprât avonde e si podeve doprâ la lenghe ancje par la musiche,…
CC24Otubar#06 – Sal veve dit

#06 – Sal veve dit
Sal veve dit mil voltis, “Al à di jessi vert”.
Di cuant che si jerin sposâts cuarante agns indaûr jê si insumiave cuntun tinel di siôrs dut so par puartâ lis amiis a cjacarâ e a bevi il tè, chê orende bevite che no i plaseve ma che e jere di gale. Biel piturât, cun mobii gnûfs, sal impensave cuntun sofà vert dongje dal barcon, par cjapâ la lûs plui biele dal dì par lei, la sô passion di frute. Al scugnive jessi vert il sofà dai siei siums, un colôr pardabon nobil che i plaseve une vore e che e veve viodût intune riviste dal piruchîr.
Cuant che i fîs a jerin rivâts no vevin ni bêçs ni timp par pensâ al so tinel, ma nol jere stât mai dismenteât. Cumò che ducj a jerin lâts vie par sposâsi o lavorâ tal forest, a jerin restâts di gnûf di bessôi, jê e il so om.
Il discors dal sofà vert al veve tacât a bati sul cjâf dal om e tal cûr de femine. Fin che la fortune si jere metude tal mieç par cumbinâ e savoltâ dut.
E lave al marcjât dal paîs cuant che une amie le veve menade a comprâ un grate e vinç, e chei mil francs i jerin colâts tal grim dal nuie. Cul cjâf plen di bêçs e di ideis e veve tentât di traviersâ la strade cul ros e une machine le veve cjapade di plen.
I vevin coventâts cinc mês par jevâsi dal jet e altris trê par tornâ a cjaminâ. E simpri cun chel sofà vert tai pinsîrs. Ferme tal jet dal ospedâl, sal impensave di matine, iluminât dai rais dal soreli, lis ombrenis verdis scuris che a platin lis ruis de stofe verde cesaron.
Il dì che e lave fûr dal ospedâl, il so om i fasè une sorprese. Par che e vuarìs miôr, a cjase le spietave il so tinel cuntun comut sofà dongje il barcon.
A pene rivade e cjapà un libri e si sentà, ma no veve tacât a lei. E cjalave indevant, a voi spalancâts la magle rosse dal sanc dal om che e vignive fûr dal so cjâf e che si faseve simpri plui grande parsore il celest dal sofà.
“Vert, al scugnive jessi vert! Sal veve dit mil voltis.” I disè al judiç. “Se nol fos stât daltonic a mi varès spietât par comprâlu… al à vût il cjâf dûr fin tal ultin dì, il gno om.”
di Noemi Salva (Mari de Gnot Nostrane)
#1775
Teme: opare di Antonio Camaur, (Ritratto della moglie su divano blu, 1909)
1 comment
Lasse une rispueste Cancele rispueste
This site uses Akismet to reduce spam. Learn how your comment data is processed.
Scrivinus a contecurte[at]gmail.com
Jentre te Liste di Contecurte
Ultins coments
In chê volte il furlan al ere ancjmò doprât avonde e si podeve doprâ la lenghe ancje par la musiche,…
In chê volte il furlan al ere ancjmò doprât avonde e si podeve doprâ la lenghe ancje par la musiche,…
A son passâts pe Ostarie
Adelmo Della Bianca Alessandro Valoppi Alessia Meacci Alessio Ecoretti Angelo Floramo Barbara Battel Bepi Zefon Carli Pup Cecilia Liva Checo Tam Christian Romanini cjadenedicontecurte Covidcurte Day Cristina degli Uomini Davide Peressoni Di Suald DoneBete Dree Venier Eduart Baschera Egle Taverna El Fari Eline Enrico Tomasi Eowin Fantacorsecurte Ferdinando Passone Francesca Giorgetti Franco Marchetta Franco Vigo Frank Spada Fuguline Fulvio Romanin Gaetan Cogôi Galliano di Buenos Aires Gianfranco Pellegrini Gianluca Franco Giuliana Pellegrini Guido Covàs Isa Dorigo Ivano Urli Jacum Tiburzi Jacum Trevisan Jaio Furlanâr Javier Moscufo L'Antescûr Laura Dri Laurin Zuan Nardin Lenart Gjavedon Leonore Lorele la Morete Luche Bagnarol Luciano Marinig Lupo Manarie Maghe Olstrele Marcello Marangone Marcelo Del Mestre Margarite Cogôi Maria Veronica Moscufo Mario Facile Marisa Gregoris Mariute Massim Furlan Massimilian Glîr Maurizio Di Fant Maurizio Mattiuzza Michele Vuardianut Calligaris Michêl Londar Milio dai cjans Nello Malisano Nene Furlane Noemi Salva Norma Romotowski O. Zete Pablo Gortan Passadôr Patrizia Torossi Pauli Fantini Pauli Jacuz Pieri Moràs Pierina Gallina Plume di Ingjustri Rafaêl Serafin Renzo Brollo Renzo Turùs Ricardo Gregoretti Ricart Tiburzi Rudy Citòs Sandri Carrozzo Scoltecurte Silva Ganzitti Spirt Anonim Stefano Gasti Stefano Lombardi Stiefin Asquini Stiefin Morat Stiefin Stefanut Stralunade Tiziana Novello Tommaso Pascolo Zorz Cesaratto





E pensâ che une volte e vevin za masse chei che vevin le cassele par i lens. Lussian