CC24Otubar#02 – Cancar

#02 – Cancar

La veretât e je che no sin plui usâts.
Al rive alc che al ven a cressi intor di nô, dilunc dai agns, che si remene, che nus cjalcje, che nus fruie, nus sfante; un miscliç di vergogne, presse, braùre, suponence, maluserie, stufe e forsit cualchi altre malatie dal spirt, che noaltris, umans che a àn di ce vivi e di ce murî, no crodìn che a meretin jessi curadis. E invezit, no jessi plui usâts a bussâsi al è un cancar che no ti cope, ma ti robe istès il vivi.
Un cancar che al si intache intai lavris des personis, che ju ten lontans, che ju sburte a fevelâ masse, e simpri, e mai par dî alc che a jentri dentri intai sintiments, pluitost che tes orelis. Un cancar che al pâr impussibil di proviodi, di fantacins, cuant che bussâsi al è cîl dal mont e cjâf di opare, al è sgrisul e corint, zulugne e canicule, ombrene e soreglade, meracul e infinît. Bussâsi, ta chê volte, al pues bastâ. A dut.
A.
Dut.
Bussâsi.
E vonde.
Par l’eternitât.
Ma ancje cumò, a lei chestis riis, il cancar us à cjapât dentri. O vês fat cori i voi su lis vocâls e lis consonants, sburtât vie i pinsîrs cence pensâ, sintût cence sintiment. O sês za a vore, a spas, ator… Lis peraulis us àn corût tes orelis e vonde. Us al torni a dî: suponence, braùre, vergogne, presse, maluserie, stufe e forsit cualchi altre malatie dal spirt.
Fermaisi.
Cumò.
Fermaisi.
Vait indaûr.
Pensait a la ultime persone che o vês bussât.
Che o vês sierât il mont di fûr, doprant ogni fruçon dal timp par zuiâ lenghe cuintri lenghe, salive te salive, voi sierâts che a cjalin voi sierâts.
Mans che a strenzin par tignî dongje un cuarp che in veretât al è dut sburtât inte bussade.
Pensait a tropis altris voltis che o sierais i voi, te vite, di sveâts.
Cence pôre. Cence ingôs. Cence bussâsi.
E cence vergogne, braùre, suponence, presse, stufe, maluserie.
E cence nissune altre malatie dal spirt.
Mai.
E je cheste la rispueste.
Mai.
Cuant che si busse, in chel timp, si siere une puarte in muse a cualsisei fruçon di tristerie, di negativitât, di fastidi, di cragne che a vegnin a sporcjânus.
E pûr, no sin plui usâts.
Cemût vino fat? Cemût si puedial, cressi cussì?

di Pieri Moràs (Atile)
#1771

Imagjin: opare di Alessandra Aita