CC24Setembar#18 – Polene cence barcje

#18 – Polene cence barcje

Mi visi ben di chê sere, e o sai che o puartarai il ricuart te tombe tant che la robe plui preseade che o ai. Une volte che chest cancar mi varà lassât bessôl dentri dal infinît. Une volte che di me al sarà restât dome il ricuart, a vongolâ tal vint che al rît.
La mê cjâr si consume a ogni gnove zornade, ma al è come se la muart, che mi spiete a pene di là dal cret, mi judàs a rifinî i ricuarts che mi rindin om. Soi vignût ca sù a vivi di nuie, sielzint l’esili dal mont e das personis: no mi soi mai sintût bessôl, fin ta chê sere.
Fûr dal barcon il tramont al costruís la sô gjeometrie oblicue parsore dal prât, e mi dà a pene la lûs che mi covente par dâi forme a chest çoc. E sarà la mê polene cence barcje.
Chê sere al vignive sù il timp e o vevi puartât dentri lis bestiis. La nêf e veve za cuviert dut. Cuant che e à pocât ae puarte e someave une aparizion. Nancje di cuistionâ, le ai fate jentrâ, i ai dât di bevi une tisane, cuvierzintle cuntune sfilzade intant che e tremave sentade devant dal fûc. I ai dât di mangjâ un pôc par volte, man a man che e tornave in ca di dut il frêt che e veve cjapât.
Si è indurmidide su la mê poltrone cuasi subit. O jeri restât a cjalâle. La lûs rosse dal fûc, zuiarine sui soi smursiei, lis mans slissis, la bocje un pôc vierte. I soi vincj agns. I miei sessantedoi.
Ricuardarai simpri cuant che si è sveade e o vin tacât a cjacarâ sot vôs. Cualchi volte la gnot ti domande di puartâ rispiet e no fâ rumôr.
Ricuardarai simpri cuant che e je vignude a sentâsi plui dongje di me e mi à dât une bussade sui lavris. Mi visi che il gno pet si è slargjât, cjapant dentri monts e colôrs. Dal barcon e filtrave la prime lûs. La nêf e rifleteve dute la purece dal sô cûr di zovine.
Mi visi che une lagrime mi à bagnade la muse, e che no mi soi nancje suiât cu la manie de cjamese.
La mê pipine di len e devente simpri plui vive, sot dal gno curtis che i dà la forme de zovine di chê gnot. Jo planc a planc o mûr, ma o lassarai alc di biel al mont.