CC24Setembar#10 – I fradis

#10 – I fradis

Bon. I doi fradis si son stufâts dopo incà e a son partîts inaltrò, prime un e, dopo cualchi an, chel altri. A àn molât il bar plui famôs dal paîs che al jere ancje rivendite di tabacs, sâl e gjornâi. Li si zuiave ancje la Sisal. O compagnavi spes gno probarbe Gusto a zuiâ la schedine. Il biât om, mai che al vedi vinçût alc, si fermave a scambiâ dôs peraulis cun lôr, fasintsi servî spes une rude, chel licôr vert fuarton.
I doi bariscj no vevin mai cjatade une cristiane, che jo o sepi. A jerin “singles”, si disarès cumò. Vedrans. Doi tocs di pan. No masse tabaiots. Jo no vevi masse confidence cun Pieri, il plui vecjo e Milio, il plui zovin.
Ju ai simpri viodûts a lavorâ come mus tal bar, a sopuartâ chê intate, chei cjochetons che une volte a devin tant dentri cul momo e che magari, dopo vê fat il zîr di dutis lis ostariis, a murivin cjapâts sot, zirant in bale cu la biciclete cence ferâl, come che al capità a puar Vigji.
Lavorant tant, a vevin dibisugne di stacâ e cussì, ogni istât, i doi fradis a partivin par une vacance al mâr cu la lôr Lancia blu.
Puarets. Dôs voltis a àn vût i laris tal magazen a puartâ vie scjatulons di spagnolets. Ma la robe piês e je stade chê volte che a jerin rivâts tal bar dai bulos de piês fece di Udin. A volevin continuâ la fieste pe vitorie dai blancs e neris e a domandavin simpri di bevi. Pieri e Milio a un ciert pont ur àn dit di no.
Alore i maladets galiots a àn tacât a spacâ butiliis e tacis e a pestâ i doi fradis come il bacalà.
Dopo a son scjampâts. Milio al è lât fûr in strade a cjapâ il numar di targhe ma chei si son fermâts. A son tornâts dentri a puartâi vie il sfuei. E le àn fate francje.
Jo ur auguri dome mâl par vê batût chei doi puars cristians!
Mi visi la dì dopo di Milio, suturni, daûr dal banc cuntun voli neri. No savevi ce disii. O sai che al provave tante amarece.

Us ai dit che a son lâts inaltrò a distance di agns. Ta chest puest, lôr che a àn simpri vivût insiemi, a son separâts: un di une bande e un di chê altre.
Milio nol è seri come ta chê volte de barufe, cumò che mi rît inte fotografie de sô colombere.

di Checo Tam
#1751

1 comment