CC24Setembar#08 – Trois sparîts

#08 – Trois sparîts

Gustâf, daspò di une vite, al tornà a vivi te vecje cjase de famee.
Ogni dì sot sere, al impiave la pipe e al leve a cjapâ il tramontan sot il puarton di cjase,
La fumere des bugadis lu sturnive obleantlu a sierâ i voi, a chest pont a rivavin lis olmis dal passât. Al ricuardave che di piçul cui siei amîs a levin ta chel salvadi pustot a stuzigâ lis tanis dai grîs, il sît al jere stât bandonât e dome lôr a savevin rivâ transitant vecjis stradelis di tiere batude e plenis di sterps imberdeâts che a rindevin impussibil il passaç des personis, ma no par lôr, che a tornavin simpri a cjase cui zenoi scussâts e cualchi altre macolade.
Chestis stradis si slungjavin jenfri lis borgadis colegant cjasis e personis.
Però vuê chê vecjis stradelis di tiere no esistevin plui, chei che si ricuardavin di lôr pôc a pôc a forin partînt. Dut al jere cambiât , il progrès al jere rivât. Nissun al leve plui a pît, lis stradis asfaltadis a rimplaçarin chei trois e lis machinis lis cjaminadis.
Dut câs, lis gnots di istât, se si scoltave ben, si podeve sintî i rivocs des ridadis, des conversazions che une volte a passavin a traviers di lôr.
A jerin ricuarts che a sunsuravin tal aiar, contant storiis di vitis vivudis su chei trois sparîts, che ancje se no esistevin plui, a jerin ancjemò vîfs tai ricuarts di chei che une volte ju cjaminavin.

di Galliano di Buenos Aires (Fuschi)
#1749

2 comments