CC24Setembar#02 – O capìs

#02 – O capìs

Ma ce isal di capî? Si impensaiso di une volte? Dai nestris vons?
Musiche? Ma cuale musiche! Dome in glesie e lis cjantis de purcission. Ben che e fos lade une bande, poh, poh, poh, cuant che e jere la sagre o une fieste grande!
Savê lis robis che a sucedevin? Lì dal mulinâr, che al ingrumave lis gnovis daûr dai sacs di farine, par no che lis viodi il plevan e che lis tirave fûr cui clients che al saveve lui, ma no stâ dîi a nissun, eh!
Culture? Lis recitis che a fasevin i fruts di scuele a Nadâl. Lis contis dai viei intant des filis inte stale, lis gnots di Unvier.
E cumò, invezit!
Baste fracâ chel boton e tu sâs dut, parfin tropis amantis che al à chel ministri, trop sbelet che e si smalte su la muse chê atore, di ce colôr che a son lus mudantis di chel cjantant! No isal biel?
E po lis musichis! No impuarte se no ti plasin, l’impuartant al è di savêlis, par podê fâ biele figure!
E dutis chês novelis (novelis?) che a ti contin il mont di cumò, ce maniere che al è, che ti pâr di sedi li ancje tu!
E nol è mighe vonde! No! Tu sâs ancje ce vistît che tu âs di comprâ, di no lâ fûr di cjase cuntune mude fûr di mode, diunusvuardi!
E no dome vistîts! Di dut, nainis di ogni sorte, che tu compris e che magari nancje no ti coventin, ma vustu meti la sodisfazion!
Bon, insome! Jo o cjali, o cjali fis. E o capìs, ancje, sì, o capìs. O capìs che nol è nuie ce capî!

di Laurin Zuan Nardin (Ippogrifo)
#1743

2 comments