CC24Avost#23 – La vite vere

#23 – La vite vere

“Cuant finissistu pardabon i agns?”
Distirade sul divan, Eline e poie in bande il telefonut. E à a pene scoltât il vocâl dal so amì Michêl: “Eline, jo no vuei fâti vuê i auguris di bon complean. Dopo ce che o vin passât o pensi che il timp al sedi lât fûr dal semenât. Trop vino vivût pardabon se o jerin sierâts in cjase? O vin pierdût dal dut il sens dai dîs e dai mês. Al coventarès un algoritmi, par gjavâ vie il timp vueit e calcolâ il nestri vêr complean. E jo in chel dì ti fasarai i auguris. Mandi!”
Michêl al à reson, ma Eline no lu sa cemût fâ chel calcul.
Cence pensâ e passe une par une lis pagjinis dai siei diaris: e à tacât a scriviju di frute, e dopo no à mai fermât. Ancje tes zornadis plui ordenariis e à simpri scrit cualchi rie.
Dongje e je la scjatule di cusî di sô none Bete, di chês blu dai biscots. Dentri, lis fuarpiis buinis che nissun podeve tocjâ, botons, cernieris e un rochet di fîl colôr di arint. La none i veve dit di stâ atente a chel fîl, cence spiegâi parcè.
Tes pagjinis vueidis di vite e tache a scrivi dut ce che e à pierdût ta chei mês: il conciert dal so grup preferît, il prin dì di scuele di so nevôt, la vacance in Irlande disdetade. Ma ancje: i ex amîs deventâts no-vax, il sens di sigurece sparît, il futûr scancelât e scliçât intun presint cence jessude. Dut ce che e varès volût vivi ta chei mês, jê lu scrîf.
No sa nancje jê parcè, ma e tache a leâ lis pagjinis cun glagns di chel fîl colôr di arint, par meti dongje il libri de vite scancelade. Une glagn, dôs, trê, fin che e reste dome une pagjine e la ultime glagn di fîl.
E va devant dal spieli par dâ l’ultin pont. Un lusôr narançon al jemple la stanzie. Chê altre Eline i ven incuintri, le cjape par un braç e le tire par di là dal spieli:
“Benvignude te tô vite vere, chê che ti an puartade vie!”
“Ma aio di stâ ca par simpri?”
“Al dipent. Des voltis “par simpri” al dure dome un minût!” e i cimiie.
Eline e va fûr de puarte, incuintri a une altre vite. No savìn se e je tornade.

di Stralunade (Muspilli)
#1738

1 comment