CC24Avost#21 – Aliens vs umans

#21 – Aliens vs umans

Salacor usgnot nol vignarà. Une volte nol vignive cuasi mai, no plui di un o doi viaçs al mês. Ma cumò… Al è come se al ves finide la fase esplorative e si preparàs a atacâ. Atacâ, sì. Luche al cognòs lis intenzions dal alien. Al è vignût su la Tiere par studiâ i umans plui inteligjents. Come sô mari. Papà al à simpri dit che la mame e je un cjavat. So pari… Se lui al fos cun lôr al savarès ce fâ. Ma il pai cumò al vîf di une altre bande, ancje se Luche nol à ancjemò capît ce che al è sucedût. Une sere si son sentâts parsore dal so jet e a àn tacât un discors cence cjâf ni code sul amôr e sui spazis personâi. Polse di riflession, le àn clamade.
Al è stât plui di un an indaûr. Lis primis setemanis, Luche al sintive sô mari che e vaìve dute la gnot tirant sù cul nâs. Papà al varès savût cemût tirâle sù. Ma lui nol jere e Luche si sintive cussì piçul e inutil…
E dopo al è rivât l’alien a confusionâ ancjemò di plui il so mont.
Une gnot Luche al à viodude la ombre passâ denant dal barcon. Al à spiçadis lis orelis e al à sintût un ticâ lizêr cuintri il veri di sô mari. il rumôr al è lât indevant par oris, po plui nuie. A son passadis setemanis prime che al tornàs. Cumò però l’alien al à rivât a vignî dentri. Lu sint talpinâ ator, jentrâ te stanzie de mari, fâle cisicâ. La prime volte Luche al è corût fûr de cjamare berlant, ma al à cjatade sô mari sot lis cuviertis, scaturide pe sô jentrade salvadie. L’alien al passe pai mûrs, forsit al è invisibil. Sô mari, dut câs, no i à crodût. Ma lui al sa che e je in pericul e le protezarà. Sì, al è lui l’om di cjase, cumò.
In cjamare al à une fersorie di ghise, une fionde, claps e une podine cui gavetons. Salacor la aghe e funzione. E veju, i cisicaments di sô mari. Le torturin. Luche al cjol lis sôs armis e si svicine ae puarte, cidin come un gjat. Dut un moment, le vierç e si bute dentri cu la padiele che e sbat in dutis lis direzions. Si ferme dome pal zigâ de mari. Distirât par tiere da pît dal jet, so pari, crot.

di Teresine la çuete
#1736