Il teme pe CorseCurte24 di Avost

Pene che la mestre e tache a spiegâ, scrivint une liste di peraulis ae lavagne, Vigji Moràs e Ahmed Al Shabaab, sotvôs, a tachin a tichignâsi.
«Tu sês cence sgrimie e cence creance, pucefadiis che no tu sês altri!»
«E tu sei più scimmia e più puzzolente!»
«Ma tâs, tâs, cul cjâf pustot che tu âs no tu larâs mai inniò!»
«Anche tu non sei a posto!»
«E tu tu âs il snait di un plat di brût e la fantasie di un niçul!»
«Ma io ti spacco la faccia!»
«E jo ti fâs marcolâ fin tal inaltrò!»
«E io ti prendo a calci!»
«E jo ti cjapi a bracecuel fin a fâti viodi lis tarlupulis!»
«Scemo!»
«Mastiefumate!»
«Fumato tu!»
«Cjalçumit cence braùre!»
«Calzolaio sarai tu!»
«Uh, ce cago, tu sês pardabon ferbint come una copasse! Util tant che un sbit intune beorcje!»
«Porco sarai tu! Carogna putrida!»
«A si cjate prime il stricei di un igloo che la glagn de to cjuce in scjapinele!»
«Eh… tu non ce l’hai nemmeno la cuccia, poveraccio!»
«Ma finissile di sbeleâ e sbivicjâ salive che tu parîs une strissule gjavade fûr di un frico patoc!»
«Eh… tu… Eh tu sei un pezzo di merda!»
Ma cheste ultime e ven fûr a vôs masse alte e la mestre e à un salustri e si volte. Te classe al ven sù un caligo che si pues taiâlu cuntune britule…
«Salacor cumò ti ai ben sintût!», e dîs a vôs basse, cjalantju ducj i doi.
«Mi scusi, signora maestra…» al tente cuntun sclip di coragjio il frut.
«Nissune scuse, Vigji! Cheste e je la ore di furlan, e si à di fevelâ furlan! No son ametudis ecezions! Non vuei sintî nancje une peraule par talian! E cumò viôt di screâ il cuader traduzint dutis lis robis che tu i âs dit a Ahmed fin cumò! E finî la vore par doman! E di prionte cun valutazion sul regjistri! E se no tu cumbinis… fasiti judâ di Ahmed!»

2 comments