Classifiche de CC24 di Lui

O vin vût cualchi fastidi cui timps, chest mês, stant che o vin scugnût anticipâ la sieridure des votazione e dai judizis de jurie e cualchidun nol sarà rivât a fâ dut. Ma ae fin o vin une classifiche dal mês di Lui, un vincidôr di tape che al torne al sucès, un gnûf paron de classifiche gjenerâl e une disfide avincente intal FantaCorseCurte.

O vin vût, chest al va dite, un nivel un tic plui bas intes contis. Il cjalt si viôt che nol jude a scrivi e lis feriis neancje. Cun di plui, tancj a no àn davuelt dal dut il teme, che al domandave di ambientâ la conte intun ciert continent, diferent di chel che si vîf.

O speravin di vê contis ambientadis… boh, in Finlandie, Cine, Gnove Zelande, Cîl, Canada, Burkina Faso, Isole fiji, Lussemburc, Madagascar e… invezit a son rivadis pardabon pocjis cuntune ambientazion reâl. In tancj le àn sghindade fevelant dal continent in gjenerâl, come Europe e Afriche, e altris restant tal paîs che a son, ma fevelant di altris. Il zîr dal mont, in sumis, al è stât curt.

Ma dut câs cualchidun nus à fat pardabon fâ un biel viaç, magari ancje maluseriôs, ma intens e plen di emozions. E alore anìn a viodi i risultâts di cheste tape numar 7, prime de Stagjon estive.

Prin in classifiche, ma dome in gracie dal judizi dal public, stant che al à vinçût il FCC24, nuiemancul che Catine la Nere, musse che si conferme in plene forme, stant che e je rivade seconde il mês passât e che e veve vinçût za la tape di Zenâr. Tornâ, la sô conte ambientade in Americhe latine, e je sedi un viaç, sedi un insegnament. Vait a leile se no lu vês fat.

E compagn al è di dî de conte di Vercingetorix, un outsiders de part basse de classifiche, che nus à puartât pardabon intal clime frêt dal Polo Sud, framiç di forans di glace e inte Stazion taliane. La storie però e je… une storie di fantasimis! Ancje ca o sin a nivei alts e za dal titul: Sculturis cul seglot.

Tierç puest une conte sociâl e emotive, suntun teme cjalt che al fâs discuti une vore, ma che si cjale simbri de bande che nus va miôr. Afriche, la conte di Torototele e je curte ma precise.

Pal rest, aromai o vin capît cuâi che a son i mus che si spietin e no àn deludût Teresine la çuete, Daûr la lavagne e Glorious Grene. Tornin adalt ancje Nevio e Stele Alpine. Di chê altre bande, Atile e Brene Sfolmenade e Incocalît a son un tic plui jù dal solit e al è jentrât in crisi Ippogrifo.

Si che duncje, vele ca la classifiche (che par viodile ben podês cjatâ su Fb e su Ig.

Di notâ ancje che doi mus une vore titolâts a àn forsit saludât lis lôr ambizions di podi zuiant il bonus No Cumbini. Nonio e Muspilli no son rivâts a presentâ la conte e si sa, la CC24 no son i 100m… e je une Maratone! E il merit plui grant al è rivâ insom scrivint contis ogni mês o cuasi.

Si che, in gracie di chescj risultâts, vele ca la sorpresone: O VIN UN GNÛF LEADER DE CLASSIFICHE GJENERÂL!

Catine la Nere e je passade denant di Brene Sfolmenade, ancje se di dome trê ponts, e la lote e je pardabon avincente. Subit daûr Glorious Grene e varà di difindi il sô tierç puest di Teresine la çuete, aromai rivade subit daûr cuntune rincorse fenomenâl. Altris, in veretât, a somein plui distacâts, ma bisugne viodi ancje se i prins doi a tignaràn bot cun chest ritmi…

E par sierâ lis classifichis e lâ in feriis, ve ca ancje il FantaCorseCurte24. A votin in pôcs e o vin doi scometidôrs che no falin un colp: Muspilli e gjatemarangule, in pratiche a son pari e in pratiche ancje cheste volte, pûr cence induvinâ i prins a àn brincât tes primis 5. Derna invezit al à scometût mâl e al è sbrissât un tic indaûr e Marycry, Ricart e Jacum a stant recuperant une vore di posizions e a son jentrâts tai 10.