CC24Lui#26 – Hijab

#26 – Hijab

– Jo l’hijab no ai voie di metilu.
– Sumaya, tu tu lu metis come dutis chês altris. – i dîs sô mari.
– Ma o sudi come une disgraciade sot di chê tele.
– Se ti sint to pari ti cope. Metilu sù e tâs!
– Mari, cjalimi tai voi, vûstu dîmi che tu no tu âs mai pensât di no metilu? E di lâ fûr di cheste cjase cence platâ i tiei biei cjavei neris?
– No conte ce che o pensi jo. – e rispuint Rahma a sô fie savint di no vê rispuindût par nuie.
– Il gno desideri al é chel di cjapâ la puarte di cjase, cui cjavei ch’a svolin, e cori pes stradis di Jalalabad cence pinsîrs. E viodi che cun me e ven ancje Layla, e daspò Hana, Rima, Nour, Aya e Yasmina. E cuant che o rivin in Place Dand Gharra si metin tal mieç de rotonde. Si cjalin ator. E o viodin che dutis lis feminis di Jalalabad a son li. E tu sês ancje tu. E tu mi cjalis tai voi e o capìs che tu mi volis libare.
– Sumaya, nancje tu vessis di meti il niqab o il burqa. I tiei voi si viodin benissim, e si viôt il mâr che tu âs dentri. La tô bocje e je une linie che scjavace il mont e su chê linie tu tu podis cori come une mate…
– Alore lassimi cori… – la interomp Sumaya.
– E alore tu sês mate pardabon.
– Sigûr che o soi mate. Vûstu jessi mate cun me?
A passin dîs seconts intun cidinôr sureâl.

E la conte e finis chi.
“Ce brut finâl” o disarês vualtris.
E je vere, ma il finâl al é ancjemò di scrivi. A tacaran forsit Sumaya e Rahma a scrivilu. O forsit Layla, Hana, Rima, Nour, Aya e Yasmina. O magari Shireen, Rana, Dalal e Dima. Ma al vignarà il timp che cheste conte e varà un finâl stupent… e libar.

di Daûr la Lavagne
#1714