CC24Lui#23 – Jaja Lawal

#23 – Jaja Lawal

La bandiere dal gno paîs e je verde e blancje. Verde tant che i boscs e blancje tant che la pâs.
Liu Xi, serie e cidine tal so Nail&Beauty Salon di Agbor street, mi à fat lis ongulis te maniere plui patriotiche pussibile: ognidune lacade a formâ 3 strichis verticâls – une verde, une blancje, une altre verde, e tal mieç un cercli di glitter (che nol sares te bandiere, ma il glitter mi plâs).
Usgnot lu viôt e o ai voie di jessi maraveose. O sai che i ten une vore ae patrie. Mi justi il vistît, che al continue a sbrissâmi jù, mieç centimetri par volte. Se e dome o ves cjapât un pôc di pês o podarès jemplâ almancul une cope 36FF…
John Obinna Udechukwu.
Dome a pronunziâ il so non mi ven cjalt framieç des gjambis.
Al è biel… e siôr. Si sin viodûts in universitât, al veve intor un cjapiel blanc, une cjamese di sede rosse e i ocjai di soreli, al jere li par fâ un intervent tal cors di cine contemporani. I soi lade daûr, in aule, ancje se o soi iscrite a Siencis politichis e chel cors alì nol jentrave tra i miei. O jeri iscrite, anzit. O ai decidût di molâ dut e provâ a jentrâ a Nollywood. Al dîs che o ai potenziâl.
Ma lu à dit cuant che mi à viodude, subit dopo dal cors, al Twist Lounge. Al pensave di vêmi incuintrade par câs, ma lu vevi tignût di voli e mi jeri fate cjatâ alì.
Al à spalis largjis e la piel lisse lisse. Mi à dit che nol viodeve la ore di discrotâmi, e cussì al à fat, dopo un pâr di Daiquiri, te sô Lexus gnove.
Mi met un vistît vert, curt e strent, che al stedi ben cu lis ongulis. Mi met lis ceis fentis e un pôc di profum tal cuel.
Il whatsapp de mê amie Kehinde mi fâs cloteâ, ma o resti in pîts. Nol covente nancje fâ une ricercje, che il feed di Facebook mi presente bessôl un post di J Theboss Udechukuwu: une foto dal gno cûl crot, compagnât di hashtag che no ai voie nancje di ricuardâ.
O respiri a fuart. O cjapi sù la mê borsete gnove (verde) e mi buti tai rumôrs e tai odôrs de gnot di Lagos.
Jaja Lawal. O deventarai une stele dal cine. E o soi pronte a dut.

di Margarite Cogôi (Glorious Grene)
#1711

1 comment