CC24Avost#16 – Il Mastiefumate

#16 – Il Mastiefumate

“Moviti mangje dut!” …ma a mi la sope cun dentri la croste dal formadi vecju a no mi plaseve, mi lassave il savôr di garbs in bocje e lis lusignis che a vogavin tal plat mi fasevin fastidi.
“Sêtu encjemò lì? Finìs la sope o tu viodis il Mastiefumate a cori par il cjamp!”
Jo, cheste robe no le ai mai viodude, il non a mi faseve pensâ a une coltre fumule che e vigneve indenant dai cjamps, a scjavaçave lis rois e e stave ferme intun puest, penze, maligne, basse come lis vessis che mià fradi al faseve dopo vê mangjat lis verzis in padiele.
E je: “Daipo pare jù, no ti plâs? Pense al savôr da la piza. Tire il cjâf indaûr e mastie, il bocon a ti sbrisse jù pe gose plui svelt!” e dopo: “cjale cjale l’uselut e vierç la bocje!” ma jo neancje cussì o mangjavi chel sbrodegot e alore je: “se tu la mangjis ti compri une barcjute a baterie”
Tal siò cjâf e masanave ogni idee par fâmi mangjâ la sope. Ma nuie di fâ, peraulis a vueit!
“Se tu mangjis la panade, il Mastiefumate a ti lasse viodi il Carosello”. Cheste robe a mi lu a dit une sole volte… dome je e podeve savê che o volevi viodi il Carosello! Duncje e jere je il Mastiefumate. Scuvierte! Motîf in plui par no mangjâ la pandane, la sope e i cais in tocjo!

di Laura Dri (Bultrik)
#1731