CC24Avost#04 – Sinfonie

#04 – Sinfonie

Salacor, ae fin le ai cjatade.
No che e fos la uniche pussibile. La perfezion, in fat di peraulis, si cjate dome tes tarlupulis dai poetis. Ma jo soi un musicist, jo o cîr la glagn des armoniis, il stricei des notis, il lâ inniò di une gabie toniche, il niçulâsi dai sunôrs tor di une scjale, il marcolâsi dai timbris intune consonance, la vibrazion cence creance di un cressint o la onde emotive di un davoi di struments che si cjapin a bracecuel. E pûr, jo, ancje se musicist, o partìs simpri des peraulis.
E la ultime peraule de mê sinfonie, la peraule che mi coventave e je je stade… screâ.
Le ai cirude par mês e cuant che le ai cjatade, par mês o ai lavorât parsore par cjatâ i sunôrs, parcè che al è cussì che o compon, cussì che e nas la mê musiche. Cjapâ une peraule, cjalâi dentri, intivâ la sô anime, impirâ il so spirt, lis beorcjis dai siei significâts… e mudâ dut chest in musiche. E no lu fâs dome cui struments, o almancul, no dome cun chei che la int e considere tâi. Flâts, cuardis, percussions… dal sigûr mi coventin, ma no isal un sclip di magjie ancje tal ronâ di un mus ferbint di Sedilis o tal pivetâ di un semafar par vuarps di Sidney? No isal un timbri plen di sgrimie intal cori jù pes scjalis in scjapinele di un frut, la matine di Sante Lussie? O il çoncjâ sec des fuarpiis par cuinçâ, o il sbeleâ de moka dislidût tal profum dal pancôr.
Jo o dopri dut chest, par dâi vôs a une peraule.
E screâ e je chê che mi coventave par sierâ la mê prime opare. Screâ… plui in bande di disniçâ, che nol à chel savôr di bielece e novitât… screâ che di non e fâs scree, cun chê code di gracie che o ai rindût cul strissinâsi di un vistît di nuvice, sul scjalin di une glesie di campagne. Screâ che e je amie di creance, come il pocâ zentîl dal sbivicjâ su lis fueis di un cjamp lassât pustot, dopo il salût dal vecjo, partît pal inaltrò. Screâ che e je fie di creâ, che o ai rindût cuntun cidin, une piçule polse di semiton, che e dure dal fâ al doprâ. E a vierzi l’acuardi dal screâ, un violin, pene piçât, a marcâ il sgliciâ dai dêts su la plastiche di un regâl insperât, spietât di agns.
E mi ven pardabon di ridi che la ultime peraule, il finâl de mê prime e ultime opare sinfoniche al sedi screâ, peraule che a intindile in superfiç e vûl dî scomençâ alc, dulà che jo, invezit, a novante e passe agns, plui di metât dediâts a chescj miârs di sfueis, cumò, di bessôl, in miserie te mê cjase frede, pidimentât, cence aghe e cence curint, crustant un toc di pan dûr, ju brusi, un par volte, par scjaldâmi i vues e scjampâ, almancul par un marilamp, a la criùre dal vivi.

di Pieri Moràs (Atile)
#1719

1 comment