CC24Lui#07 – Capo indian

#07 – Capo indian

Cualchidun une volte mi à dit che jo intune mê vite precedente o soi stât ancje un capo indian, di chei che a vivevin libars inte Americhe dal Nord.
Alore te mê fantasie e je vegnude fûr cheste storiute a proposit dai prins abitants di chel continent cussì lontan dal nestri.
A pene nassût e presentât cun braùre a dute la comunitât dal alt dai braçs di gno pari, al è stât a colp evident che jo o vevi alc di particolâr, di fûr dal normâl, e al è par chest che cence esitazions mi àn clamât: Sivilot Grant!
Cuindi cun chê scuse o soi simpri stât considerât come sacri, e venerât come il classic “totem”, o di plui come Manitou vîf in Tiere, e la mê cariere come capo tribù e je stade in tâl mût bielzà ben segnade.

Cussì intal timp no mi lassavin nancje partecipâ a la cjace al bisont, a fâ e disfâ lis tendis cuant che al jere di trasferîsi di altris bandis, a fâ lis garis cu l’arc e lis frecis, e mancul a fâ alenament cul curtis e il manarin.
Mi vevin dât di dirit une mê tende personâl, colorade di tancj ucei che a svualavin di ca e di là, e di cuant che o vevi tredis agns la mê cjasute di piel e jere deventade un biel via vai di “squaw” di dutis lis etâts in vene di emozions…
Ma la mê fortune e je stade cuant che mi vevin afidât il comant de tribù che e veve di scombati cuintri une altre pal domini dal teritori di cjace dal bisont. In chê volte o soi stât avonde brâf a direzi la mê int a vinci la bataie; no baste, parcè che la tribù che e veve pierdût, come premi mi à ufiert in spose la plui biele frute zovine che no jere ancjemò sposade: Pavee Bocone !
Propit dut su misure…
E al è inutil contâ che dopo cheste union la mê famee e à vivût intune grande tende, piturade cun tancj uceluts e paveis, e che o sin stâts ducj legris e contents fin avonde, e cun tancj fruts, par dute la vite.
Graciis Manitou!

di Renzo Turùs (Chel di Cormons)
#1695