CC24Lui#04 – Indianapolis

#04 – Indianapolis

Cumò il puar Zuan al è in come e us disarai che mi fâs propit dûl. Nol mertave di fâ chê fin. In font al è simpri stât un bon diaul.
Ma tachìn dal imprim.
La prime e ultime volte che o soi stât in Americhe o soi rivât cui miei doi amîs al aeropuart La Guardia. Zuan nol saveve une peraule di inglês e alore i vin dit. “Zuan, a lis domandis dai doganîrs, tu rispuint simpri YES o fâs di sì cul cjâf”.
Dome che si sin inacuarts che chel truc nol leve ben cuant che i ispetôrs i vevin domandât se al puartave tai Stâts Unîts droghe e armis! O ai scugnût intervignî jo, che un pôc di inglês lu mastii.
Bon. O vin fitât une machine, une Dodge Challenger, e o sin rivâts fin a Columbus e Indianapolis. Su lis culinis Zuan al à viodût parfin i bisonts e jo e Toful i vin ridût in muse: “Zuan, no tu viodis che a son sacumis?”
Sì. Sacumis in grandece naturâl! O savìn che i bisonts a son rârs, fin dai timps dai maçalizis di chel sassin di Buffalo Bill. E alore tocje fâju fents, po!
Bon. O vin viodût il Gran Premi. Si sin fats fotografâ dongje de Eagle di Kowalsky, il campion, che nus à ancje firmât i autografs.
O vin mangjât e bevût.
Lâts a viodi il flum Mississippi. E Zuan al à ancje comprât une maie stampade, verduline, cul dissen di un dai batei che a corevin sul Mississippi, i ferry-boat; Made in Taiwan, naturalmentri.
Dut al jere lât ben fin cuant che Zuan al à fat une des sôs monadis. Il basoâl, a une fieste, al veve bevût masse Bud e, al control di un pulizai, i veve dât un patafut suntune spale, crodint di fâ ben. Chel altri si è sintût agredît e il puar Zuan al è stât vuadolât e metût inte scjaipule. Lu àn molât su cauzion e o vin finît ducj i bêçs che o vevin.
Si sin fats rivâ un vaglia par podê fitâ une altre machine e tornâ a New York. Pierdût l’aeroplan, o vin scugnût prenotâ un altri.
Insome, tornâts in Patrie, jo e Toful o vin lassât pierdi Zuan. Se a capitarà, cualchi briscule nostrane in ostarie ma mai plui lâ ator pal mont cun lui. Nol è afidabil l’om!
Pûr trop il probleme no lu vin frontât.
Pene tornâts al à fat un preseament pesant a la morose di un bravaç li de ostarie “Alla Speranza”.  Morâl? Il bravaç i à tirât une cjadree intal cjâf!

di Checo Tam (Derna)
#1692