CC24Jugn#27 – Teresine la çuete

#27 – Teresine la çuete

Fredo al jere un bon zovin, educât, simpri pront a dâ une man in paîs, al cueieve la cueste ogni an pe Sagre dal perdon, al compagnave i fruts cul furgon de Parochie aes fiestis dai zaguts e a ogni richieste al rispuindeve simpri “Sigûr!”
Une altre robe i plaseve un grum: stâ cui amîs, tal bar, in discoteche, a cene fûr o in place sot de statue di chê femine che nissun al à mai capît cui ch’e rapresente, a fâ cuatri cjacaris.
Chistis cjacaris a jerin cuasi simpri centradis su doi argoments: balon e feminis. E se pal balon Fredo al jere propit l’espert massim (al saveve ancje il numar di scarpis dal ultin panchinaro de ultime scuadre in classifiche), beh, par ce ch’al riguarde lis feminis si fidave di chei altris. A jerin i amîs a detâ lis regulis par decidi se une zovine e jere biele o no, se a valeve la pene fai il fîl o se al jere miôr lassâ pierdi. Ma Fredo al veve une sigurece: la fantate plui biele dal mont e jere Teresine, nissun dubi. Ma ducj a ridevin di chest fûc ch’al moveve i sintiments di Fredo, parcè che Teresine… e jere çuete.
Par agns Fredo no si è mai niçât a dichiarâsi, fin a chel lunis che finalmentri al à cjapât coragjo.
Teresine e lavorave come segretarie tal ufici dal plui impuartant comercialist di Udin. E chel lunis si è viodude jentrâ dentri chel fantat ch’al veve simpri jemplât i siei siums, chel zovin biel come il soreli, dolç come la mîl e cul riduç di une Monna Lisa fate om. No veve mai olsât dî nuie, ma jê, di Fredo, e jere inamorade.
Fredo si fâs dongje e a basse vôs i dîs: “Teresine, jo o provi par te alc che no pos spiegâ, il gno cûr al bat dome parcè che al sa che tu tu sês al mont… ma i miei amîs mi disin che no ai di stâ cun te, par vie… par vie… ben, tu âs capît par vie di ce. O soi vignût a dîti che tu saressis la femine de mê vite, par sigûr, ma che mi tocje smenteâti e voltâ pagjine. O fasarai però tante fadìe.”
E dit chest si volte e al fâs par lâ fûr. In chel, Teresine, ricjapade de batoste di une delusion cussì fuarte e cussì di bot a sclop, cun vôs ferme si rivolç a Fredo: “Sint po, pipinot! Ancje jo o jeri pierdude par te. Ti ai simpri cjatât un fantat speciâl… e invecit mi tocje viodi che tu sês ancje tu un dai tancj ch’a no capissin cemût ch’a si sta al mont.” E cjolint vie il mût di tabaiâ dai amîs di Fredo e va indevant: “Jê e je masse zovine, e je masse vecje, e je masse alte, e je masse basse, no je de famee juste, e tabaie masse o masse pôc… e je çuete!” E in chel a cjôl la calcolatrice ch’e à su la scrivanie e le tire intôr a Fredo cjapantlu sul cerneli. “Cjò… cun cheste tu podis fâ ducj i conts che tu volis par capî di cui inamorâti.”
E cussî Fredo al è tornât a cjase cun tes sachetis une umiliazion e une calcolatrice.

di Alessandro Valoppi (Daûr la Lavagne)
#1686

1 comment