CC24Jugn#19 – Atile

#19 – Atile

Di agnorums la grant part de umanitât e à cirût di spiegâ la sô origjin. Dut si riduseve intune domande. Cui lu aial fat? E simpri si rivà ae stesse rispueste: “lu a fat LUI”.
LUI, al podeve cjapâ une declinazion divierse a secont la ete, il puest, il popul, anzit, LUI in tantis puescj al deventave LÔR tal câs di civiltâts politeistis.
Intant che i umans a sviluparin capacitâts cognossitivis la sience e cjapâ un puest in chest cantin e e tacà a dâi forme a une spiegazion dal pont di viste logjic pratic daûr di teoriis evolutivis.
Tal mieç, lis flabis a derin ancje forme al nestri esisti, doprant copassis che a tignivin sù il mont e altris contis.

E je cussì che la umanitât e passà miliârs di agns daûr di crodincis e teoriis che vuê a rivarin al lôr epilic, sì cumò, tal an 3200 D.C.
Daspò di jessi a sta intal megaplanete K9 di plui di vincj agns une spedizion archeologjiche e scuvierzè la tombe di Atile, un zigant che al veve dât il vie al nestri planete e ae nestre esistence.
Inte tombe si cjatarin documents che a descrivevin il procès che Atile al veve doprât. Intune descrizion precise al spiegave cemût che al veve fat partint di un model di materiâi inerts, al veve modelât dut il planete cun mars, tieris siche creaturis e che par dâ vite a dut al svicinâ une font  di energjie: il soreli.

E je cussì che la umanitât e rivà a rispuindi a dutis lis domandis de sô esistence daspò cetant timp.

Cumò a vanze dome une rispueste, di cjatâ: cui aial metût in pîts la tombe di Atile?

di Lenart Gjavedon (32)
#1679

2 comments