CC24Mai#25 – Conciert in Ongjarie

#25 – Conciert in Ongjarie

Al stave sentât tal mieç de bande e il conciert al jere a pene scomençât.
Dopo mês di preparatîfs, la bande si esibive finalmentri intune citadine dongje di Budapest, un avigniment impuartant par celebrâ il so cincuantesim aniversari.
Clarinets, flauts, saxofons, trombis, trombons, percussions… a stavin ducj ator di lui. La mestre ju dirizeve cun grinte e la musiche e sunave. Ma lui, nol podeve plui. Al cirive di stâ fer e concentrâsi sul so spartît, ma al rivave a stent.
“Mestre, o âi di pissâ!”, i disè sot vôs il piçul saxofonist.
“Ten dûr!”, i rispuindè la mestre.
“Mestre, o âi di pissâ”, al ripetè tremant. “Fâle dentri del saxofon!”, i rispuindè la mestre. Intant flautiscj e clarinetistis lu cjalavin cun disdegn. No si podevial evitâ chêste brute figure?
Il piçul saxofonist al jere disperât. Le mestre lu fulminà cuntune voglade.
“Mestre, ti prei, o âi di pissâ!” Finût il prin toc, al le di scuindon tal gabinet.
Cuant che al tornà indaûr, dut il public al aplaudì il sax bariton che al veve vût un problemut tecnic.
Lui al varès volût sprofondâ.

PS: Il piçul saxofonist al à 37 agns e forsit, prin dal conciert, al veve bevût une bire di masse.

di Daisy
#1655