CC24Mai#23 – La ultime cene

#23 – La ultime cene

In chel piçul borc di mont ogni Invier a restavin dome une grampe di abitants a cjavalgjâ la crudeltât de nature. Di solit a jerin no plui di dîs animis a tignî vîf chel toc di tiere che in chê trate dal an al someave colâ inte ete glacial. Une cundizion climatiche che e rindeve il puest pardabon isolât dal mont al mancul par doi mês. Par comandament divin nol jentrave e nol jesseve nissun.

Chel an, inte liste dai ardîts a jerin restâts: doi vecjuts che cence dissendence e nancje un franc lu fasevin par scugnî, cuatri operaris specializâts de centrâl di biomasse, che a cumbinavin il minim personâl di mantigniment pe colossâl struture, doi zovins a pene sposâts che si fermarin par sielte coragjose, l´ostîr tant che furnidôr de mangjative e curadôr des provisions e, par ultin, il plevan.
Plui in lâ a jerin a sdrindulâ cualchi cjan e gjat che a vevin imparât a dâsi dongje par conferîsi alc di cjalt.

Il prin mês al scorè cence un salt, ognidun al someave movisi intun mût di ibernazion, piês cun piês, la nêf e rivà a nivei mai viodûts e la mobilitât intal borc e jere sù par jù nule, fale dôs radunadis fatis cuntune precision religjose, ven a stâi, la sabide di gnot te ostarie e la domenie a buinore te glesie. Nol mancjave mai nissun, nancje i nemâi.

In mût particolâr, tal lunari di chel an, la gnot di Nadâl e colave te sabide, e par decantazion Nadâl di domenie. Une cumbinazion perfete par dâsi dongje te ostarie pal cenon e la matine daspò te glesie pes peraulis santis. La mangjative e fo une fieste e lis peraulis dal plevan a derin a chê gnot une atmosfere propite biele, fale une frase dal predi che e lassâ ognidun un tant perplès: “Nol si sa mai se cheste e pues jessi pardabon la ultime cene”.

Tant che une premonizion e fo propite cussì, la matine daspò te glesie nol comparì nissun, nancje i nemâi. A jerin ducj cuancj muarts, cence segnâi di violence, tant che a rivarin a capì i investigadôrs un mês daspò cuant che a rivarin tal puest.

A son za passâts dîs agns di chescj fats che a comoverin la opinion publiche cence mai rivâ a vê un indizi.

Alore al è il moment just par confessâ che o jerin in cinc operari e no cuatri, te centrâl de biomasse, un stabiliment ce tant grant che mi permetè di platâmi cun lis provisions necessaris par burî fûr, meti in pîts e scrivi cheste opare mestre in prime persone.

di Lenart Gjavedon (32)
#1653

1 comment