CC24Jugn#13 – Fuschi, fischi, foschi

#13 – Fuschi, fischi, foschi

Fuschi, fischi, foschi!

E la cinture dal vecjo si plee il necessari par cjapâ sù lis clâfs che i jerin coladis par tiere.

Nol jere la prime volte che lu spiavi dal barcon di cjase. Cuant che i coventave molâ la schene al recitave chestis peraulis.

Jo, cun vot agns, o pensavi a voltis cun ligrie a un mâc, e a voltis cun pôre a un strion. E se par invocâlis mi fos stramudât ancje jo intun vecjo scalembri?

Ma un dì mi soi decidût a provâ. O jeri daûr a cirî di cjapâ cualchi cjariese adalt tal arbul, cence sucès. O ai tacât a nomenâ cun fuarce lis trê peraulis e daspò o provavi.

Nuie. E nuie ancje une seconde volte.

Alore mi e rivade une vôs: – No si fâs cussì. Tu âs di nomenâlis tal stes timp dal stirament, no prime. E mole fûr dut l’aiar.

Il vecjo mi cjalave a traviers de fereade. Dit chel al e jentrât in cjase sô.

Al veve reson. Intune sole stirade o soi rivât a cjapâ un biel trop di cjariesis.

Propit chê altre dì, il vecjo al e lât vie. Si diseve tal borc che al cirìs un afit plui economic,

O vevi adotât il sisteme. Mi servive tant par i zugatui intun cjanton sot dal jet, o par rivâ ae credince dulà che la mame e platave la cjocolate, o par rimpinâmi suntun arbul.

Fuschi, fischi, foschi!

No lu ai mai dit a di nissun, mi sintivi sielzût, puartadôr di un legât misteriôs par tignî dûr un tic di magjie.

Nancje dilu, rivade la adolessence, mi soi persuadût che chê robe no fos vere. Mi soi dit che e jere stade une fantasie di frut.

E propit cumò mi torne il ricuart, cuant che o soi par jentrâ te sale operatorie dulà che mi fasaran une chirurgjie a cûr viert. L’infermîr mi dîs di contâ denantdaûr tacant di dîs fintremai che mi fasi efiet la anestesie.

Ma jo o preferîs mormorâ: Fuschi, fis-chi, f… o… s…

di Zorç Cesaratto (Matungo)
#1673

4 comments