CC24Jugn#08 – Daûr la lavagne

#08 – Daûr la lavagne

Vuê, cjaminant sù pai nestris crets, mi soi intivât intune piere nere: lavagne. Tornâ indaûr tal timp al è stât un marilamp. Scuele, e je, la lavagne, poiade come l’orcolat cui siei pidons di len in bande de catedre de mestre. ’68. Prime elementâr. Gran part dal mont si colorave di ros, nô invezit dut contrari. Grumâl neri lis mestris, grumâl neri ancje nô, ma almancul cun biei flocs blu e colôr di rose. La lavagne, grande e ruvide come i cops che i nestris nonos a cueievin vie pe France,  il zes parsore si tacave come un nin su la tete de mari (vuê su lis lavagnis sintetichis, al vuiche come il purcit a Sant Andree), precise, cui siei ricuadris  ben segnâts par scrivi ben chê robe gnove che al jere l’alfabet. Sîs, siet, vot agns e o jerin aromai dispatussâts, e se Jê, par denant, e mostrave dut il bon de gnove Italie, par daûr a sucedevin robis; cuant che chel berli ”Vai dietro la lavagna!”al jemplave la aule, e a cui destinât? Ai scuelârs  mus, coronâts di orelis di carton par vie che no tignivin ben il penin, a maglavin il cuader, a tiravin cualchi porco, a fasevin orelis sui sfueis dai compits, a cjacaravin furlan, no jerin pratics di adizions o di libris… ma a vuidavin tratôrs, a lavin te stale o a puartâ il lat prime di lâ a scuele, e vie indenant. O sin cressûts, ribei, fradis piçui di fameis grandis, e daûr de lavagne i prins social.
Cul zes robât, si faseve a turni dispiets, par la daûr di jê a scrivi codis, emoticons, jeroglifics dome par chei che a savevin leiju. ↑→≈⃝ (a trê dopomisdì a fâ il bagn tai vascons puartait il balon).
In altris câs al jere un puest scuindût dulà provâsi  vistîts che cualchi mestre di cûr a puartave par dâ une man a chei plui intrigâts in famee.
Par denant si scriveve, si preave e si stave composcj, par daûr si rideve, si progjetave, si olsave. O jerin vîfs. Te nestre scuele, je, ancjemò e rît di chei scrits restâts su la sô panze e nus insegne che se no tu nassis o tu pensis par ledrôs, il mont che vuê ti viest, ti larâ simpri strent.

di ?
#1668