CC24Mai#06 – Vampîr ostîr

#06 – Vampîr Ostîr

Palit, corutôr par dinastie nobiliâr, tratîf ancje se no propit bielon, un tic confusionât e impussibil di cjapâ, al cognòs un unic mût di passâ il timp: gjoldi.
Mai cuiet, dentri tal mantel neri cjarbon e sot di un cilindri sfracaiât intal cjâf, che al tapone i voi mostacjins, ogni sere al ven fûr dal so cjistiel, prin che al coli il dì, inte ore di aur.

Al zire ator ator e, cuant che e ven fûr la lune, al sielç la femine plui sauride, par lui prede di gale.
Daspò i fâs la cort cence teme di esagjerâ.
La sô tressadure – di cuasi dôi metris – e sposte l’aiar, lis narîs, tant che gatul di monts plenis di nêf. I siei voi a sbusin il timp, simpri impiâts di boris a smicjâ il cuel cjandit di femine fine e, pussibilmentri, dacuardi cul so progjet suparin.
Une vore smorfeôs cun chê, forsit, fortunade e simpri gnove, fantate, cul so mût di ridi sot de creste, lui le cjape e le zire e le ingredee come che i va ben, prin di cjariâ la sô infalibile baionete, che, mai e a sbaliât smire: dôi, uçâts dincj di diamant, plens di sêt di ribuele rosse, tant che il vin novel de sô ostarie.

Un precîs, agjil CIK e un sbruf gustôs, si dà al amplès plui intivât dal secul.
Parât ju, glotût, digjerît: AAAH!
L’enesim, gloriôs, moment di gjonde, perfet par jessi incidût intal steme de sô, onorade, famee. Propit parsore de puarte grande, sore il puint jevadôr dal so cjistiel.

Palit, corutôr par dinastie nobiliâr, tratîf ancje se no propit bielon, al à gjoldût ancjemò, chel  svampît di VAMPÎR OSTÎR!

di Pierina Gallina (Stele Alpine)
#1636

2 comments